Polo que dicen, Carme Forcadell cantó la palinodia nel Supremu. Que too eso, Señoría, yera de mentira, por entretenese, too ello: la declaración d'independencia, el referéndum, la república catalana... Ná de ná, caxigalines. Por rise un migayín. Y que, por supuestu, taba cola Constitución y a favor del 155 (l'artículu, non el décimu de llotería de Navidá).
Y a mi, nun sé por qué, recuérdame los mios tiempos de cuando neñu (allá, pel diluviu, más o menos). Insultábamos, por un decir, a un mayor que nosotros y, cuando nos garraba, dempués d'obliganos a pedi-y perdón, entrugábanos si díbamos volver a insultalu. Decíamos-y que non, naturalmente, polo xeneral ente ¡ayes! Pero dempués, en cuantes nos soltaba y tábemos a una distancia prudencial, chábamos a correr y gritábemos otra vegada l'insultu: "gochu, marranu, castañapodre".
Y a dar zapatilla.
Nun sé por qué, al sentir les disculpes y les desplicaciones de la Forcadell, alcordéme d'entós, de cuando yéramos neños.
No hay comentarios:
Publicar un comentario