Acaben de dexanos dos políticos de los qu'entamaren la so xera enantes de morrer Franco y nos primeros años de la democracia.
De don Vicente Alberto Álvarez Areces pue decise que fue "l'animal políticu" más notable, a muncha distancia, de tolos demás políticos asturianos: na so actividá pública, na so vida representativa, na so llucha intrapartidista. "El más llistu", si s'entiende bien. Supo ganar (casi) siempre y sabía "vender" lo que facía y lo que nun facía.
De la so obra van quedanos obres importantes, dalgunes discutibles, pero importantes: El Musel, el campus de Viesques, El Niemeyer, l'Huca..., anque, repito, pa dalgunes d'elles había delles alternatives. En Xixón supo aprovechar una coyuntura importante d'inversiones del Estáu.
Don Francisco Prendes Quirós (col qu'entamé nel PSPA) fue tamién un "animal políticu" hasta los caberos momentos de la so vida, pero con menos suerte (y, polo tanto, con menos éxitu) qu'Álvarez Areces. Frente a esti, nun fue pa vencer nes batalles internes del partíu y seguramente un ciertu aristocratismu personal llevólu a retirase a la so torre de marfil siempre crítica y siempre activa, pero fuera de les estructures partidistes.
De los dos (¡qué coincidencies tantes muertes nestos díes!) vamos guardar memoria llargu tiempu.
No hay comentarios:
Publicar un comentario