El martes, 15 d'ochobre, Santa Teresa. Anticiclón, sol, y ábrigu: calor.
Tres notes: A la entrada del Piles, na desembocadura veo daqué solla muerta, pero, sobre too, veo cómo gaviotes y gaviotos peleen dientru del ríu (ha pocu agua) espicotiando solles, que acaben por sacar fuera pa comeles. Entruga: ¿les solles muerren pola contaminación o dalgunes d'elles o toes muerren porque les ataquen les gaviotes? Observación: los gaviotos paecen más agresivos que les gaviotes (tres gaviotos y una gaviota).
Segunda nota: cientos de coríos emigrantes nel ríu, hasta'l "Puentín" y más enriba'l "Puentín" (pa mozos y foriatos: el puente'l Piles, en La Guía), Les Mestes enriba, hasta'l final del Grupu. Dellos anden de cortexu. La proporción ye de cinco machos o diez por una fema (hai dalguna parexa que parez yá parexa estable). Entruga humana: ¿cuála será la perspectiva de machos y femes delantre d'esa disparidá? A lo meyor: elles, ¡qué pesaos! Ellos: ¡Lo qu'hai que trabayar!
Tercera nota: alvierto un par de solles muertes na vera'l Grupu, a l'altura del polideportivu Les Mestes. Como nun ye fácil que les tresportare haste ellí nel picu una gaviota, cabe entrugase si suben tan enriba (durante'l mio llargu tiempu como profesor d'El Piles, tenía asistiáu un allugaderu onde tolos años asentaba una solla, xusto enfrente l'institutu, claro que a l'altura'l polideportivu Les Mestes ye muncho más enriba).
No hay comentarios:
Publicar un comentario