XIXÓN: LO
PROGRE CONTRA LOS PROBES
L’Ayuntamientu de Xixón anda
empeñáu nuna campaña doctrinarista que tien el mesmu impulsu emocional
(qu’ellos llamen “ideolóxicu”) que la desertización esprés de Pedro y Ribera:
ser los primeros y más destacaos contribuyentes del mundu mundial na llucha
medioambientalista, ensin tener en cuenta les sos consecuencies sobre la
realidá. Sobre la desertización industrial y l’empléu (y, naturalmente, les
carteres), el tándem Ribera-Pedro; sobre los ciudadanos xixoneses, el binomiu
Ana González-Martín.
Dense cuenta de les
repercusiones que sobre comunidaes y provincies como Lleón, Galicia y Asturies
ta teniendo yá la política del Gobiernu central (por ciertu, con más ruíu nes
protestes en Lleón qu’equí). Pues bien, en Xixón les víctimes van ser non
satamente los probes, pero sí los trabayadores, los xubilaos y les clases
medies-baxes.
Embaxu del nome de “Ordenanza de
movilidá” lo que ta entamao ye un “Plan d’inmovilidá”, restrinxendo l’accesu a
varies zones de la ciudá a coches con dalgunos años, esto ye, polos sos años
d’estrenu, col pretestu de que contaminen más, non de que nun cumplen coles esixencies de la ITV.
Yá suponen ustedes que los que
puen camudar de coche con frecuencia (inclusu, por presumir) son la xente que
tien perres, y la que caltién el coche vieyu ye, más bien, que nun pue tener
otru.
Eso sí, en paralelu, incentívase
la compra de coches eléctricos (“Cometimos
el error de vender un producto que no teníamos en la estantería. No
tenemos dónde enchufarlo y su precio es carísimo. Nos equivocamos todos”,
diz del artículu nada menos que Pere Navarro), pero non la sustitución del
vieyu.
Otru efectu negativu del doctrinarismu municipal va ser el cierre de
l’Avenida del Molinón: al tráficu, empobináu per Fernández Miranda, van
conducilu a un par de ratoneres pa llegar a la Carretera de Villaviciosa,
aumentando contaminación, gastu y malhumor.
Y los
impuestos, igual.
L’impulsu será progre, pero les
víctimes son aquellos que dicen representar y defender.
No hay comentarios:
Publicar un comentario