Juan Cueto Alas y Cuentos de llingua afilada

JUAN CUETO ALAS Y CUENTOS DE LLINGUA AFILADA L’añu 1984 asoleyábase el mio conxuntu de narraciones curties Cuentos de llingua afilada, yera’l númberu 1 de la colección Llibrería Académica, qu’edita l’Academia de la Llingua Asturiana. El llibru abríase con un prólogu o antoxana de Juan Cueto Alas. Dientro unos díes resumiré, como acabo de facer con Lluna llena y Como yéramos, los cuentos del llibru. Agora lo que quiero asoleyar ye’l Prólogu de Juan Cueto Alas, escritu a máquina y con correcciones a mano, lo que tien la so gracia pensando en que Juan Cueto diba ser l’apóstol y el ximielgador de les nueves tecnoloxíes, dixitales y audiovisuales. El conteníu d’eses páxines prologales, francu, asoleya munches de les duldes y rocees que tenía una parte la sociedá asturiana culta al respective de la normalización y modernización del asturianu. Pero nun ye eso pa lo qu’agora saco a la lluz estes páxines. Fágolo como un recuerdu y un homenaxe a Juan Cueto Alas, a la so xenerosidá, al so humor, a la so intelixencia, a la so capacidá de diálogo, a la so bonhomía, a la simpatía que despertaba y l’afectu que llegamos a tener dende orielles distintes d’el Piles (Juan vivía en Villa Ketty, a la otra oriella del Piles). Que sirvan tamién d’homenaxe y memoria de la so muyer, Rosa González Fernández-Corugedo. (Por ciertu, pa mayor facilidá, fago la publicación en dos entregues).