Lluna Llena: una coleición de cuentos

LLUNA LLENA Resume del llibru y un par d’anotaciones sobre les sos narraciones y la escritura. Lluna llena, Llibros del Pexe, coll. Puzzle, númberu 5, Xixón, 1990. Una antoxana de 1989 y once cuentos, Pelleya de raposa, Aquella mañana, Los tres momentos rellumantes de Ramón de Suncia, El concertín, Hestoria d’Equis, Llucía, ¡Oh, nun me fagas pasa otra nueche con Mr. Churchill!, El movimientu V.C, Una perconocida historia d’amor, Ensin nome. Pelleya de raposa (fys.9-15). Mentantu la espera’l taxista, la protagonista va contá-y a Lluii, el so maríu, difuntu hai 14 años, les duldes que tien sobre si arreyase con un nuevu amor, Xosé, que-y regalara una pelleya de raposa. Les duldes son les que-y provoquen la edá propia, cincuenta y un años, y el deterioru na so piel y cuerpu, que-y cuesta volver enseñar, porque sabe d’esi deterioru. Canor (fys. 9-28). “El meyor pesquín del pueblu tenía cara de pulpu”. Asina comienza una historia que tien como protagonista a Canor, personaxe singular, pesquín singular, historia que contada dende la perspectiva d’un yo narrador, acaba con un final sorprendente y terroríficu. Aquella mañana (fys. 29-43). Historia de la malquería ente dos caseríes y los dos propietarios. Lluis ye propietariu d’una casería grande, con perres y mecanizada. Ye solteru. Xuliu yelo d’una casería probe y pequeña, ensin mecanizar, con una catrapada fíes. La malquería vien d’antiguu, ensin saber mui bien de cuándo o por qué. El rellatu cuenta dellos desalcuentros, nel presente de la narración, ente Lluis y Xuliu. Los tres momentos rellumantes de Ramón de Suncia (fys. 45-55). Ramón de Suncia, nel momentu l’entamu’l rellatu tiene cincuenta y dos años. Un daqué escadriláu, ente un poco simplón y un munchu de bonu. Medio abandonáu polos pas, un tíu suyu metiólo a trabayar nuna estación ferroviaria, ente los trenes. Ellí, mentantu pasea d’un llau a otru, refierve dos momentos estelares de só: cuando salvó a un perru de ser estrapalláu pol tren y cuando se casó. El tercer momento rellumante va sabese según avanza la narración hacia’l final. El concertín (fys. 58-64). Un monólogu d’un concertín, na so primer oportunidá como talu, mentantu toca y refierve la malquería que contra él tuvo, yá dende mozos, l’antiguu concertín, al qu’agora sustituye. Hestoria d’equís (fys. 65-74). Un comisariu de policía revisa’l diariu d’una persona qu’apaeció muerta en casa. Los documentos son una reflexón del muertu sobre la so situación de paru, la soledá y la vida. Llucía (fys. 75-82). Rellata les reacciones d’un pá dempués que s’entera que la fiya ta ingresada na UCI por un accidente. Mentantu ta al so delláu, ensin qu’ella dea muestres de sentilu nin reaccione, el proxenitor repasa les sos rellaciones y la so ruptura tiempo atrás. ¡Oh, nun me fagas pasar otra nueche con Mr. Churchill! (fys. 83-86). Una rellación erótica contada detenidamente hasta’l final, sorpresivu. El movimientu V.C. (fys. 87-91). Un movimientu revolucionariu secuestra a los escritores aconceyaos na casona de Verines. La obra ye un escritu coyuntural pa lleelu en Verines, durante un alcuentru escritores llendáu por Víctor García de la Concha. Una perconocida hestoria d’amor (fys. 93-99). La historia d’una parexa enamorada na qu’él llega al sacrificiu por completar la felicidá de los dos y los sos sueños y deseos. Ensin nome (fys. 100-91). Los díes posteriores a un conflictu nuclear xeneralizáu d’un matrimoniu, Antón y ella, a la que nun se-y da nome, con tres fiyos, Colás, Delia y Anxelu; la comprobación de la desolación absoluta al salir del abellugu nuclear onde se caltienen unos díes, y les sos sufrencies hasta’l final de la historia. Una historia perdura, desasosegante. Delles observaciones: Temática, mundu, cadarma narrativa. Son variaes, riques y creativos. En daqué midida reflexen el mundu d’aquellos años, pero, amás d’ello, tienen un calter xeneral, non arreyáu a aquella dómina. Darréu los años que l’autor vivió pal oriente, apaez muncha toponimia de Piloña, Güerres, Colunga y descripción de los sos paisaxes. Llingua: Ortografía preacadémica, con delles soluciones estremaes d’esta. Nótase tamién la influencia del oriental (l’autor vivió y trabayó en Piloña cinco años, veraneó en Güerres, décades), por exemplu, nos alverbios xeneralizaos n-u. Valoración: Salvo El movimientu V.C., los cuentos son bonos, na cadarma narrativa, nel mundu descritu o na psicoloxía de los personaxes, la emoción o el misteriu. Hailos especialmente duros, pola situación personal de los personaxes o pol mundu descritu; hailos tamién emocionantes positivamente. Tocántenes a la espresión, acasu modificaría dalgún asturianismu escesivu -frutu, de xuru, de la época-, y quitaría un par de castellanismos.