Pintures romanes en Grandas de Salime

Sabíase que nel Chao Samartín, sobre un poblu y poblu astur importante dende 800 años polo menos enantes de Cristu, centru seguramente de referencia de la zona, asentárense alministradores romanos pa llevar l'oru asturianu a Roma y dominar (y nun sabemos si esclavizar en too o en parte) a los habitantes del castru y a los de la rodiada.

Como centru alministrativu y de poder que yera, ellí asentárense persones romanes de daqué capacidá económica y de prestixu social, prestixu que confirmaren llamando a un arquitectu de moda pa que-yos ficiese la casa, dotándola de comodidaes y de les últimes modes.

Lo qu'agora acaba d'apaecer son una serie de pintures de la casa, pintures que son escases nel norte español.

Si quieren más datos, equí (Pilar Rubiera: pintures) o equí (Pintures nel castru del Chao Samartín).

¿Que nos presten les pintures? Sí. Pero préstanos más saber que los antiguos asturianos dueños del castru teníen yá saunes.

Eustaquio Revilla na picota

Non na cereza picota, na picota de la plaza pública.

Según informaciones de prensa (ver, por exemplu, el 16/07/10, día del Carmen), el Seprona denunció al alcalde de Grandas, Eustaquio Revilla, por facer obres ilegales, al faceles en terrenu amparáu pola llei. Según l'alcalde, la casa ye propia y tien llicencia municipal, según el Seprona, el permisu que yera pa una "reforma interior" nun podía amparar les obres esteriores: una cera d'hormigón de 1,70 metros, arquetes con tubos pa una acometía, porches de madera un nuevu edificiu con dos güecos y un teyáu d'una vertienet, asina como obres esteriores nos antiguos edificios.

Además, según el Seprona, don Eustaquio comportóse mui a lo alcalde: "en tono muy alto y actitud amenazante".

A ver qué pasa y quién tien razón. De toes formes, tamos esperando l'actuación inmediata del fiscal, a ver si cuerre tantu como lo fizo en Ponga, o a ver si lo entierren ente toos.

El cacique en Grandas

Nun falo del ron, non. Falo del cacique, Eustaquio Revilla, el alcalde, y del partíu nel qu'está, pol que lu votaron y pol que come, el PSOE.

Les actuaciones del PSOE y del alcalde vienen siendo fai tiempu un modelu de caciquismu que da un fedorientu tufu a autoritarismu.

La cabera fue mandar a la guardia civil pa que disolviere una comida de vecinos nel parque de la villa de Grandas. El pretestu fue que nun teníen permisu pa facelo, la razón que yeren xente que non lu vota.

Pa que'l llector de fuera de Grandas de Salime acaba de talantar dafechu la cuestión hai que deci-y que en Grandas ye tradición facer comides colectives nel parque tolos años poles fiestes. Los vecinos, polo tanto, nun facíen más qu'enxertase na tradición grandina: nun habíen inventado una forma nueva de protesta.

¡Y en tou casu, masque lo tuvieren fecho!

Sólo faltaba que los tuvieren detenío por glayar "gritos subversivos" y cantar cánticos d'esa mesma mena.

¿A qué-yos suena?

¡Llástima que nel equipu de gobiernu de Grandas hebia xente a la que-y tengo apreciu!

¡Vergoñoso y escandaloso!

Hasta agora nun dixe nada sobre l'asuntu La Campa Torres. Paecíame tan fuera'l mundu, tan escandaloso que pensaba que tenía qu'haber una esplicación en daqué sitiu: que sí se tuvieren entregaes les pieces de la escavación y qu'un error burocráticu o un camudamientu de responsables perdiera l'archivu o escaeciera'l treslláu..., ¡qué sé yo!, cualquier cosa. Pero, pasaos los díes, vese que nun ye asina. Nun solo paez que nun s'entregaren 20.000 pieces de La Campa y que se dexaren tiraes de cualquier manera, sinón que da la impresión de que pieces importantes pasaren a poder d'un particular o de particulares, y, pa peor, en Cataluña.

Destrozu talu nel patrimoniu arqueolóxicu y nel patrimoniu asturianu ye difícil de concebir. Esa irresponsabilidá pa colos restos beneficiaos de les escavaciones retrotraenos a enantes de los tiempos en que Xovellanos encargó a Reguera qu'escavare en Torres.

Pero d'esa irresponsabilidá y daños nun son únicamente responsables les persones encargaes de la escavación, sonlo, pola so incuria y dexadez les autoridaes polítiques: Ayuntamientu de Xixón, Gobiernu Asturianu y otros.

¿Fará falta decir que tou ello tien munchu que ver col despreciu del PSOE pa tolo asturiano, col so antiasturianismu, que ye la cañamina constitutiva del so ser?

¿Fará falta señalar la relación ente los sucesos de La Campa, Grandas de Salime y el PSOE?