El blog de Xuan Xosé: Campa Torres La

«LA JUNTA RECHAZA PEDIR AL GOBIERNO DATOS SOBRE EL HALLAZGO DE LA CAMPA»
(CON LOS VOTOS DEL PSOE Y DE IU)

La ocultación o perda (temporal) de 20.000 pieces na Campa Torres ye un asuntu importante pa IU, pero non ta importante como pa pedi-y al Gobiernu d’Areces qu’esclarie qué pasó coles pieces durante más de diez años nin al Gobiernu Xixonés.

¿Desplicación? ¡Pero, home! ¿Con quién gobierna IU nel Gobiernu asturianu y en Xixón? ¿Diben pedise desplicaciones a sí mesmos? ¿Con quién gobernaren n’años pasaos nun y n’otru sitiu.

¡A ver si piensen que son fatos! ¡Qu’una cosa ye metese con Gabino y otra mete-y el deu nel güeyu al que-yos da de comer!

¡Y yá, metéselu ún mesmu en güeyu, sería de tochinos!

Ya ven: trespariencia sí, claridá, sí, informaciones sí, pero non de lo nuestro.

¡Puxa Asturies y la cultura asturiana! (que dixo IU).

Hasta agora nun dixe nada sobre l'asuntu La Campa Torres. Paecíame tan fuera'l mundu, tan escandaloso que pensaba que tenía qu'haber una esplicación en daqué sitiu: que sí se tuvieren entregaes les pieces de la escavación y qu'un error burocráticu o un camudamientu de responsables perdiera l'archivu o escaeciera'l treslláu..., ¡qué sé yo!, cualquier cosa. Pero, pasaos los díes, vese que nun ye asina. Nun solo paez que nun s'entregaren 20.000 pieces de La Campa y que se dexaren tiraes de cualquier manera, sinón que da la impresión de que pieces importantes pasaren a poder d'un particular o de particulares, y, pa peor, en Cataluña.

Destrozu talu nel patrimoniu arqueolóxicu y nel patrimoniu asturianu ye difícil de concebir. Esa irresponsabilidá pa colos restos beneficiaos de les escavaciones retrotraenos a enantes de los tiempos en que Xovellanos encargó a Reguera qu'escavare en Torres.

Pero d'esa irresponsabilidá y daños nun son únicamente responsables les persones encargaes de la escavación, sonlo, pola so incuria y dexadez les autoridaes polítiques: Ayuntamientu de Xixón, Gobiernu Asturianu y otros.

¿Fará falta decir que tou ello tien munchu que ver col despreciu del PSOE pa tolo asturiano, col so antiasturianismu, que ye la cañamina constitutiva del so ser?

¿Fará falta señalar la relación ente los sucesos de La Campa, Grandas de Salime y el PSOE?