Yá lo sabemos: el peor tiempu (casi) d'un sieglu

Según l'AEMET (Axencia Estatal de Meteoroloxía), esti mediu añu fue'l más lluviosu dende 1931, con un 50% de lluvia más que lo que vien siendo davezu y 0,7 graos per baxu la media, ¡que tien cantu too ello!

Pa más datos, esti enllace: ¡La Virxen de la Cueva!

¡Va enterase San Xuan!

Perfartucos tamos los asturianos del tiempu. Na última selmana hubo que volver a les mangues llargues, a les chaquetes, a los zapatos de suela más gordo. Y lo que ye peor: inundaciones, argayos, afaramientos, muertes. Y, polo que paez, esta selmana va seguir igual. ¡Vaya San Xuan!

Bueno, pues va haber que facer lo que faen en Cuideiru y otros munchos llugares: amenazar al santu y asustalu pa que les coses vayan bien, o castigalu, si van mal.

Asina que si'l patrón d'esta temporada y mes, San Xuan, nun camuda les perspectives meteorolóxiques y sigue esto metío n'agua, prúa y borrina, vo castigar al santu de la dómina. ¿Con qué? Pues podemos manda-y p'allá la pómpara balera de Zapatero o la perceba de sombra d'Ovidio Sánchez.

¿Parez-yos poca condena o dalgún d'ustedes quier que-y mandemos el mesmu castigu que pedía'l vieyu de la hestoria del castigu del llobu, que nun-y abultaba ábondu ningún, masque lu encerrasen cola so muyer?

Humorada y mal tiempu

¿Danse cuenta de que dende hai meses non hai tiempu bonu en dalu sitiu? Da igual a ónde se vaya, Andalucía, Valencia, Ses Illes, Castiella: llueve y fai fríu, y si nun fai fríu llueve, y si non ñeva. ¿Qué pasó col bon tiempu?

Pues tiénenme contao que vieren a la Salgado y a la De la Vega, atapaes con pañoleta hasta la frente y rebozaes -que naide nun les conociere- con una paxmina, a la cola del Monte de Piedá de Caja Madrid. Polo visto lo que facíen yera empeñar el bon tiempu, pa dir tapando coles perres que se sacaren los furacos del presupuestu y los gastos del Gobiernu.

¿Pueden creelo? Bueno, d'esti Gobiernu espérase cualquier cosa, tan marafundiador él. En tou casu, la cosa paeza verosímil, porque lo que ye tiempu bonu, tiempu bonu, nun paez per ningún sitiu. Asina que si nun lu vendieren a una potencia estranxera ye que lu empeñaren, como diz el ruxerrux esi, que sitúa a dambes muyerines (digo lo de muyerines pola falta kilos) a la cola del Monte.

Asina, de pasu, collaboren colo de la memoria hestórica, porque si ellos (non los antepasaos d'elles, non, que fueren de los ganadores de la guerra civil), "ellos" digo, fueren "los del monte", elles son "les del monte".

El carbayu lliterariu: un veranu peor.

Pa los que piensen que`l tiempu camudó munchu y qu`esti veranu nun tuvo otru igual de malu, esti retayu de poesía de Teodoro Cuesta, dedicada a les fiestes de San Mateo, pidiéndo-y al santu qu`abocane yá, que ya tuviera bien d`agua tol veranu:

¡Ven acá, San Mateo de mi alma!
¿Tendrás bazu, si aporta, tendrás calma
pa sofrir que l'orbayu nos remueve
qu'al mozu amurnia y al ancianu tueye?
¿Dexarás que'l focicu non asome
el candilín de Dios qu'alienta l'home
pos al vellu esclucar per el Oriente
de gozu l'alma reviciar se siente?
Tú, que tienes nel Cielu tanta mano
y vieste qu'un rellume de verano
isti año non gociamos y aflixíos
más que d'homes tenemos de coríos,
¿non faras qu'abocane y d'allegría
se farte'l corazón siquiera un día?
¡Abasta, con mil Xudes, de neblina!
¿Qué fai el fresquillín, que la cortina
non escorre pa ver la lluna bella
qu'apigaza penosa detrás d'ella?
Fai qu'entame la ronda, y pergalana
al lluceru qu'anuncia la mañana,
un racadín pal sol i dexe artera
pa qu`allume y nun pingue una gotera.