Solidaridá na desgracia: un aplausu.

Llabores de rastrexu a la entrada'l puertu Xixón

Buceadores aficionaos lleven dellos díes collaborando na búsqueda del cuerpu del neñu desapaecíu al volcar una llancha a la entrada del puertu de Xixón a finales del añu pasáu.

Dende equí queremos asoleyar la nuestra solidaridá colos familiares del ñeñu y colos de los otros accidentaos. Pero, al marxen d'ello, queremos dar el nuestru aplausu a toles persones que, con un ciertu riesgu, siguen buscando'l cuerpu del rapacín y, mui especialmente, a los submarinistes -con escafandra y ensin ella-, deportivos y voluntarios, que lleven tiempu esponiéndose, cuando menos, a la inclemencia del tiempu y al mal estáu de la mar, nun xestu de solidaridá aponderatible.

Si se quier ver, per otru llau, les bones noticies y la bona xente abonda más de lo que se cree.

Aprovechamos, por ciertu, pa da-y la norabona al nuestru amigu Constancio y manda-y un estrenchu abrazu.

¡Ah, y yá ven los profesionales y les autoridaes polítiques qu'esto de la piesca deportiva y del bucéu aficionáu nun ye, como quieren ver tantes vegaes, un clu de desalmaos o de xente aprovechao! Tolo contrario.