Ayer ficiérenme el meyor regalu de munchos años. Fue en Colunga. Marita, la vilba d'Abraham y la ma del tan pronto esapaecíu Mario, del Café la Esquina, entrugóme, en broma, naturalmente, si yo fuera muyer n'otra reencarnación, vilba especialmente. Porque yera como si supiera, palabra por palabra -agora en serio- lo que piensen les mueyeres sobre la vida, sobre sí mismes, sobre los fíos, cómo falen col difuntu, etc. Con absolutu entusiasmu lo decía. Agradecí-ylo enormemente.
La verdá ye que, en xeneral, esi ye'l comentariu que faen les muyeres del mio Retrato de desposados con panamá a su frente. Porque, a propósitu, enantes de tener daqué idea de lo que diba narrar, enantes de tener dalgún personaxe, yá me propusiera facer "una novela de muyeres".
Y, curiosamente, fue en Colunga onde sintiera'l xuiciu más entusiásticu sobre Retrato de desposados..., pero esta vegada non por esi puntu de vista "de les muyeres" satamente, sinón pola capacidá d'indagación (de creación) de la psicoloxía de los personaxes, de la so capacidá de traducir "l'alma de la xente". Y esi xuiciu féxolo en públicu, esti veranu, na presentación na Sala Loreto, el mio amigu José Antonio Fidalgo, que casi nos riñe a Lluis Antón -el presentador- y a mi, por andar peles rames y nun decir de frente lo maraviosa que yera la novela.
Ehí, queda. Reitero les gracies a Marita, que me fexo un de los regalos más guapos qu'inxamás recibiera.
No hay comentarios:
Publicar un comentario