Un gamu y un homenaxe

Va yá más de diez años recibí la llamada d'una muyer que se llamaba Elena. Yera la vilba d'un paisanu que se llamaba Ignacio y del que quedara vilba de recién, según me contara. Allá fui, a la calle Cabrales, onde vivía y féxome entrega d'esti gamu, una magnífica pieza artesanal d'aceru ensierta en bambú y fabricada por él.

Ignacio (mayor que yo) compartiera migu munches marees (caún pel so llau) n'Estañu, una afición común y una empatía notable. Nun sabía yo que tenía la voluntá de dame como llegáu dalgún de los sos aperios dempués de muertu.

Vala esti testimoniu, gráficu y de la memoria como homenaxe al matrimoniu, Ignacio y Elena, a tolos pesquinos la playa Estañu d'aquella época.

Asina mesmo, como homenaxe a tolos pesquinos del presente, conocíos o non por mi, y a tantos otros del pasáu, especialmente a aquellos colos que tuve tratu. ¡Tan inxustamente trataos por toles alministraciones y tan perseguíos, especialmente pol PSOE!
Por cierto, Ignacio contóme un día, casi en secretu, que, siendo él neñu y llevando a pastiar les vaques, col riscarín, a los praos onde güei tán La Lloca'l Rinconín y el Sanatoriu Marítimu, vio que d'esmenu les vaques espantaben y que nun había forma de faceles caminar. Al poco decatóse de qu'había ellí un puñáu grande de cadáveres, toos fusilaos.
Los nomes de los muertos tán nos llibros d'hestoria pal que quiera buscalos. Pamidea, además, que nun son de los muertos que güei reivindica la memoria hestórica.