Tengo d'Alejandro Suárez, militante del PCA y de IU n'Uviéu, un gran conceptu como persona dende que lu conocí nel por tantos estrañáu programa de L'Avisperu, na COPE: seriu, trabayador, abiertu a les idees de los demás, nin un migayín sectariu.
(Por ciertu, nun falta selmana, dempués de tantos años, que me paren votantes de tolos partíos p'aseñardase del cierre de L'Avisperu; persones a les que nun conozo de nada, pero que me recuerden d'esi programa y que tienen en gran conceptu al mesmu y a los sos participantes).
Pero vuelvo a Alejandro Suárez, que, ensin dulda, tendrá sío pieza fundamental pa los alcuerdos qu'estos años se dieren n'Uviéu ente IU y el partíu gobernante, y que, como tolos alcuerdos y, especialmente los presupuestarios, son buenos pa los ciudadanos y, sobre too, marquen el terrenu que debe seguir la política, el del alcuentru, y el que debe dexar: el sectarismu, equí, tan frecuentemente, secatarismu guerracivilista.
Pues bien agora, Alejandro Suárez decide retirase de la política representativa. Vaiga pa él el mio saludu y el mio reconocimientu.
No hay comentarios:
Publicar un comentario