Caberos años de los 70 y entamu de los 80. España entera sufre una convulsión polos cambios políticos y sociales, al empar qu’argayen dellos de los sos sectores industriales, como’l naval. En Xixón, Lluis Roces asiste a toes estes mutaciones dende los sos primeros años d’estudios en La Llaboral y participa activamente nes amarraces por defender los astilleros de la ciudá. Posteriormente, dende la militancia sindical y dende l’actividá política nes files del partíu gobernante n’Asturies y na villa de Xovellanos, va seguir peleando por defender esi sector industrial y los sos trabayadores.
Paralelamente la so vida matrimonial cola so muyer, Teresa, y los dos fíos, Pelayo y Olaya, va pasar per momentos d’estrema felicidá y per otros de tensiones, fundamentalmente a causa del enfotu total de Lluis nel so compromisu social y políticu.
Al tiempu que a los avatares d’estes histories particulares, el llector ve retratáu’l paisaxe y los ambientes de la ciudá, amira la evolución urbanística y social de la mesma a lo llargo d’unes cuantes décades y asiste dende l’interior al funcionamientu de los partíos políticos, a les sos engarradielles internes; asinamesmo, a una escura trama por algamar cuotes de poder.
La narración, per otra parte, sorprende al llector nes caberes páxines con una metanarración onde’l personaxe ye llector del so mesmu personaxe y onde él y el llector asisten a un debate ultraterrenu ente dos personaxes arreyaos a la ciudá, José Antonio Girón de Velasco y Santiago Carrillo y un Dios que los observa, tanto a ellos como a Lluis, y efectúa les sos propies reflexones sobre la so obra.
Y ESTI YE L'ENLLACE PA LA SO COMPRA Y LLECTURA:
http://www.casadellibro.com/
No hay comentarios:
Publicar un comentario