Nun paren d'apaecer nos medios y na calle opiniones sobre la inutilidá de la comisión d'investigación sobre'l dineru regularizáu por José Ángel Fernández Villa. Eses opiniones, además, suelen demostrar el so plasmu al ver el tipu humanu que perillí apaez y faen una reflexón sombría sobre la política y el sindicalismu asturianu.
Si non m'aburro, porque me fiede'l tema desayaque, diré nos prósimos díes daqué cosa sobre Hunosa y el papel social de la minería n'Asturies. Agora bien, lo que merez la pena sorrayar, al rodiu de les comparecencies, ye lo siguiente:
1. No too ye negativo. Perihí apaecieren dalgunos personaxes que lleven sosteniendo la normalidá y el funcionamientu del país durante toos estos años, pesie a too.
2. Nun entiendo cómo la xente s'asusta de los tipos que ve perihí, de lo que dicen o de lo que ye'l Parlamentu. Siempre tuvieren ehí, simpre pudo velos el que quiso velos, y siempre se-yos rieren les gracies o los tomaren por oráculos.
3. Eso nun solo ye l'Asturies que tenemos, ye la Asturies a la que s'aplaudió, a la que se siguió y emponderó. Ye l'Asturies a la que se votó mayoritariamente y cuyes sandeces o tochures ocuparen les primeres páxines o fueren l'ideal de munchos ciudadanos, de munchos "revolucionarios" y de munchos "asturianistes".
4. Con too y con ello, con esi ridículu de la comisión, con esa inutilidá de los parlamentarios, con eses babayaes de munchos comparecientes, yo nun creo qu'eso vala p'abrir los güeyos a naide. Soi radicalmente escépticu: caún seguirá viendo les coses como les vio siempre y como les quier ver y, tolo más, dirá: "esti non, porque nun ye de verdá, pero l'otru que vien en sustitución d'él, esi sí". Y, sobre too, y a pesar de los actos y de les persones nes qu'encarnen les idees, seguirán pensando que les idees son bones, ¡como si la so encarnación una y otra vegada en fracasos y disparates nun demostrase que lo que son males son les idees! Los que les encarnen nun son más que l'enxendru inevitable, fatal, de les mesmes.
No hay comentarios:
Publicar un comentario