Acabo de lleer Siete vides, que nun lleera nel so momentu (2001 ye la fecha asoleyamientu, Trabe la so editorial). Una novela especial.
Ye una novela clara y ordenada na so trama narrativa, con un pequeñu artificiu lliterariu (les memories atopaes nuna llibreta y asoleyaes y completaes dempués pol descubridor de la llibreta). Xira la narración na redolada de la vida del protagonista, Andrés García, orixinariu de les partes altes d'Ayer, dientro una familia probe y campesina (probe y campesina d'aquella y hasta munchu dempués ye un pleonasmu).
Dempués d'unos años cuela pa Cuba, ellí fae fortuna y siente dempués la vocación relixosa, que ruempe a medies pol so enamoramientu con Andrea. "Escapen" los dos a EEUU y ellí muerre llueu ella a resultes d'un embarazu. La so vida ye dempués de retiru, hasta que torna a Asturies, onde pasa los sos caberos años como un probón que pelegrina peles tierres patries y les lleoneses, queríu y apreciáu de toos, y llevando enriba la so pena, los sos camientos sobre la so hestoria y la so fe, cada día más intensa.
Aparte de lo prestoso de los ambientes que describe minuciosamente, en descripciones enllenes de datos históricos, xeográficos o materiales, la novela ye una novela especial pola so llingua, el dialectu metafonéticu del centru-sur d'Asturies nel que s'escriben les sos 416 páxines.
Prestosa la novela -masque'l supuestu básicu de la empatía ente'l narrador y el personaxe, la fe, pue poner en dellos momentos, especialmente a lo cabero, daqué distancia emocional ente la mayoría los llectores y la narración-, afaladora de memoria y señardá nos detalles de les acciones y les coses pa los que conocimos l'Asturies agraria hasta finales los 70, y sobre too, encantadora pola so llingua, clara y bayurosa nel léxicu.
No hay comentarios:
Publicar un comentario