Un benefactor

Biblioteca pública. Saco esti llibru y veo que na primera páxina impresa un benefactor de la humanidá (o, polo menos, de los hipotéticos llectores del testu) avísanos, al alto la lleva:

"PURO PANFLETO"

De mou qu'ún agradéci-y que s'esfuerce en que los demás nun perdamos el tiempu lleéndolu (dexo de llau la idea de que, en realidá, compórtase como los censores de tola vida y danos la so calificación moral. Recuerden: 3R= Mayores con reparos; 4= Gravemente peligrosa). Asina que-y lo agradezo.

Noto tamién que páxines más alantre fai dalgunes anotaciones nel mesmu testu (na páxina doce). Dalgunes marxinales, delles interlliniades. Toes elles, naturalmente, llevándo-y la contraria al autor.

De toes formes, nun veo anotaciones más allá d'eses de la páxina doce, lo que seguramente quier decir que l'eséxeta o escoliador fízose casu a sí mismu, a l'alvertencia de peligru del llibru, y dexolo ehí. Eso sí, non ensin enantes dar la vuelta p'alvertinos del peligru nel entamu mismu la llectura, nada más abriri el llibru,, enantes de devolver l'exemplar a la biblioteca pública.

Por ciertu, dalgún podía camentar qu'esa alvertencia al pie del títulu ("El futuro de la libertad. Las democracias liberales en el mundo" -l'autor estrema ente "democracia", sistema d'elección por urnes, y "llibertaes", llibertaes concretes pal individuu o pa poder exercer la oposición con garantíes d'igualdá o con respetu a les minoríes) constituye una ironía fáctica de segundu grau, una especie de paradoxa como la d'Epiménides, pues delles de les amenaces contra la llibertá que l'autor camienta y muestra nel llibru veríense esplicitaes, de forma ñidia y exemplar, pola nota'l benefactor.

PS: ¡YÁ LO SÉ! ¡NUN ME MIREN ASINA! ¡ ¿CÓMO QUIEREN QUE LO TOME?