Esti preciosu arbustu

D'efímeres flores marielles.

En La Miñota, Morís, Güerres, el 23/04/16.

El so nome científicu ye'l de Forsythia x intermedia de la familia de les Oleaceae (la mesma que la oliva). Denómenla tamién campanina china y campanes doraes. Normalmente recibe'l nome escritu n'asturianu, forsitia.

Ye un arbustu de fueya caduca, con fueyes oblongues un daqué llanceolaes, un migayín dentaes, opuestes y d'un color verde vivu y brillante. Pue algamar los dos metros d'altura. 

Les flores apaecen nes ramas enantes que les fueyes, a mou y manera de grupinos, presentando coroles con cuatro pétalos en forma d'estrellines. La floración produzse ente finales de l'iviernu y l'entamu la primavera. Toles variedaes de forsythia tienen les flores marielles, que ye lo que fai rellumar l'arbustu cuando malapenes hai flores nin color nel xardín. 

Dempués de la fecundación forma un frutu en forma de cápsula puntiaguda que s'abre en dos valves na maurez.