En La Nueva España d'ayer don Máximo Braña Argüelles, jefe de sección de Sanidad Vegetal del ministeriu asturianu correspondiente, sal a retrucar al mio artículu del 3 de mayu, "No dimita, doña María Jesús", onde fundamentalmente falaba del retrasu de cuatro meses n'entregar los carnés profesionales pal usu de productos fitosanitarios y del prexuiciu qu'ello causaba a los profesionales, y, plo tanto, pedía a la Conseyería más rapidez nos trámites y otra axilidá nel procedimientu d'obtención física del carné.
Un comentariu sobre ello, que ye lo fundamental, porque'l restu de consideraciones del so artículu, El uso de productos fitosanitarios, nun tien nada que ver cola denuncia o fai precisiones sobre lo que naide diz:
Reafírmome no dicho: dos díes enantes d'escribir el mio artículu (a finales d'abril, polo tanto) encontré al enésimu demandante de carné que lu acababa de recibir y qu'aprobara l'exame en diciembre/avientu.
Pero, además, vien él mismu a confesar esi retrasu: "A fecha actual -diz- se está ultimando la entrega de los cursos celebrados en marzo y abril, que se enviarán a lo largo del mes de mayo." De marzo a mayo, son, que yo sepa, tres meses en total. Y yá veremos. En cuanto al procedimientu d'acudir a interné pa tener una especie de "permisu provisional" en la páxina www.asturias.es, vayan ustedes ellí y van ver si hai dificultaes o non nos trámites, y eso contando con que l'usu d'interné sea accesible o fácil pal agricultor, que nun siempre lo ye por munches razones. Pero, además, ta por ver que los espendedores de productos fitosanitarios fagan casu d'un apunte provisional o de la mera palabra d'un agricultor.
En cualquier casu, a mi esta demora sigue paeciéndome (dos meses, tres meses, cuatro meses, da igual) inconcebible y nun entiendo por qué nun ta disponible nuna selmana un carné que se pueda baxar d'interné pol interesáu.
Tocántenes, finalmente, a otru tema que nun depende de la Conseyería, el del tamañu y preciu de los productos fitosanitarios, ¿cómo ye posible que los envases de mediu quilo o llitru -pa xardín caseru, digamos, o pa aficionaos- de determinaos productos (dalgunos tan corrientes como'l cobre o'l glifosato -herbicida-) tengan el doble d'IVA que'l mesmu productu n'envase o tamañu mayor?
No hay comentarios:
Publicar un comentario