(Trescribo, como davezu, los primeros párrafos)
L'aprecederu

Rutiazos ideolóxicos

La agresividad y la intolerancia que llevan a la retirada de anuncios y actividades por falta de acuerdo con ellos

Xuan Xosé Sánchez Vicente 30.01.2017 | 03:19

Avilés. Les paredes de les iglesies de San Nicolás de Bari y de San Antonio. Pintaes feministes (no "femenines"). Una d'elles: "La única iglesia que ilumina es la que arde". Piensa ún, en principiu, que son rapazaes. Y sabe que, pasáu'l tiempu, dalguna de les autores tendrá vergoña de lo que fizo; otres convertiránse n' adictes y profesionales del discursu.

Les condenes n'Avilés fueren casi unánimes, pero dalgunes de les argumentaciones dan un poco de vergoña: caltener como principal motivu de crítica que se ficieren sobre edificaciones que tienen calter de bien cultural declaráu ye una cobardía pa nun comprometese muncho. Pintar les muries d'otru, como tirar basura, ye una gochada siempre, y una invasión de lo que ye d'otru o de toos. Siempre.

Pero en segundu llugar está lo más grave, el propiu conteníu: esa agresividá y esa intolerancia que va creciendo día tres día, y que lleva a grupos de tolos tipos a pidir la retirada d'anuncios o actividades porque nun tán d'alcuerdu con ellos.

Y lluegu, la relación de les pintores cola realidá. ¿Piensen vustedes que dalguna d'elles sentiráse oprimida güei pola Ilesia? ¿Tendrán visto un cura dempués de la primer comunión, si acasu la ficieren? ¿Verán siquier clérigos peles cais d'Avilés? Pues non o malapenes. [..................................................................................................................................]