Homenaxe a Enrique Suero Llera, "Javier de Montini", ayer en Güerres,

Homenaxe ayer a Enrique Suero Llera, "Javier de Montini". Güerres entregó-y l'Arcín d'Oru, un homenaxe a la so trayectoria y persona. La escultura, com tolos años, d'Urrusti. Allugo'l testu que lleí nel so homenaxe y delles semeyes que tomo d'El Fielato (https://www.elfielato.es/album/comarca-de-la-sidra/oricios-huerres-javier-montini/20230311165948047539.html), de La Nueva España (de La Nueva España (https://www.lne.es/.../huerres-hermana-festival-oricio...) y del dalgún particular. (Por cierto, l'ésitu la fiesta, que sigue güei, impresionante). Bueno, pues equí tais, los vecinos de Güerres, xente d’otres partes d’Asturies y don Enrique, el Quini de la prensa rosa, si a él nun-y paez mal la comparanza, aprovechando qu’hai unos años, a otru Enrique, Castro, Quini, dímos-y equí l’Arcín d’Honor. Resumir la biografía d’Enrique Suero Llera ye más o menos fácil; resumir los sos méritos, imposible. Nacíu en La Cepada, Carrandi, ehí pa la falda El Sueve, el 3 d’ochobre del mal añu de 1936, Enrique sintió pronto la vocación del periodismu, yá de neñu, escuchando nos chigres: “utilicé los chigres como fuente de noticias, incluso cuando empecé a trabajar profesionalmente”. “Nunca abandoné el reporterismo de calle”, dixo na Nueva España nuna entrevista que-y fixeren en 2020, a propósitu d’un de los munchos premios que recibiera na so vida, La Mazana d’Oru del Centru Asturianu de Madrid. Enrique estudió primero en Valdediós, como tantos miles y miles d’asturianos, nel seminariu d’Uviéu dempués y, finalmente, na Universidá Pontificia de Salamanca. En toos esos llugares fue ún de los alumnos más destacaos, sinón el más piqueru. A partir de 1957, Javier, o sea, Enrique, dexa aquella sienda y pasa al periodismu. Entama collaborar na Nueva España y en 1961 allúgase en Madrid, onde empieza a escribir pa los diarios Madrid y Pueblo, asina como a trabayar p’axencies de noticies como la ASUNC o, más tarde, EFE. Ye nesos años onde recibe’l Premiu Azorín de Periodismu. Tamién ye per esa dómina cuando escueye l’alcuñu de “Javier de Montini”, pol qu’adquier la so nomadía. Y masque yo pensaba qu’esi Montini tenía que ver col papa de daquella, y el Javier, acasu, provenía de “La Casa Nueva”, Javier, de onde toma’l nome’l santu martirizáu nel Xapón, nun ye asina, según el propiu Enrique: ye la sonoridá de´l so pueblu, Carrandi, el que lu afala a escoyer esi alcuñu. En 1972 Enrique especialízase nun tipu particular de periodismu, el de la prensa del corazón o prensa rosa, al entamar la so collaboración cola revista Lecturas, onde, además del so trabayu d’entrevistador y escritor, aportó a cargos importantes de responsabilidá empresarial, hasta 2006, nel que se xubiló. Permitiime apuntar tres coses sobre la so persona y obra. La primera la so peculiaridá y excelencia dientro del xéneru de la prensa del corazón, esa eufemística metáfora. Javier de Montini siempre fue esquisitu, cortés, un paisanu nel tratamientu del xéneru. Nada que ver colo que ye agora esa materia, que yá m’entendéis de sobra equí en Güerres, más que “Prensa del corazón”, debería llamase “Prensa del arcín”, y eso, por ser discretos. La segunda, el so amor Asturies. Con estes pallabres lo decía’l periodista José María de Juana al glosar la so persona cuando-y entregaren la Mazana d’Oru: “Montini ha sentido siempre a Asturias en su corazón”; y “"Que un asturiano fuera el protagonista de una noticia le hacía levitar de emoción; para él, lo asturiano está por encima del bien y del mal.” Y esi amor a Asturies, a la so tierra natal, al so llugar, simbolízase dafechamente na so memoria permanente del onde nació: La Cepada, Carrandi, ñeru, al tiempu y raigañu dende’l que creció y s’espardió l’árbol de la so persona, sonadía y escritura. Vo terminar: pero, ensin dulda, la meyor obra, de la que más orgullosu ha tar, van ser la so muyer, Conchita Méndez Val, y los tres fíos: Coral, Conchita, Enrique. Gracies por too, Enrique Javier Suero Montini, pola to obra, pola to persona.