El vienres 9 d'esti mes de febreru, los adalides de la defensa de la cultura asturiana, doña Mercedes Fernández y don Javier tamién Fernández volvieren aldericar sobre l'asturianu, verdadera obsesión de doña Mercedes (y, con sordina, de don Javier) nos caberos tiempos.
Pues bien, don Javier dio-y en focicu a doña Mercedes, chándo-y en cara que nel 98, nel trámite de la reforma estatutaria nel Congresu, ella, con Álvarez-Cascos y con Isidro Fernández (¡coño col Fernández!), propusieron lo que vieno en llamase "cooficialidá diferidá" dende qu'el PAS la propuso como solución de pautu nel 97 (solución que d'aquella nun quisieren nin IU, nin PSOE nin PP). Eso ye asina, pero onde miente don Javier (¡fáiseme tan difícil pensar que nun sabe, él, al que tanto aponderen perayures!) ye cuando diz, cuando-y refierta:
"usted cuando militaba con el señor Cascos en el mismo partido, nos plantearon a los socialistas un cambio en el Estatuto de Autonomía para hacer una cooficialidad diferida, de tal forma que si se hubiera hecho, hoy se podría aprobar con una mayoría de 23 diputados frente a 22. Pero eso no va a ocurrir porque el PSOE no quiso; de tal manera que en la próxima legislatura tendrán que ser tres quintos de la Cámara los que aprueben una decisión trascendente como esa", zanjó el presidente.
Pues nun ye asina satamente. Lo que los populares postulaben yera una cooficialidá diferidá, residenciada nel Estatutu y a la espera d'una ulterior llei de la Xunta que diba requerir una mayoría cualificada de 3/5 de los diputaos. Satamente la qu'ellos dicen, los del PSOE, que (ensin sabelo entovía) quieren poner.
Una cosa ye que nos mexemos de risa colos cucurrabucos del PP, Foro, Cascos y doña Mercedes a propósitu del asturianu y otra la verdá, que como-y gusta decir a don Javier, repitiendo a Antonio Machado en Juan de Mairena, "La verdad es la verdad, dígala Agamenón o su porquero".
Queda pa los sabios llectores d'esti blog estremar ente Agamenón, el porqueru y los...
