L'episodiu de les faltosaes y babayaes de dos xugadores del Uviéu nel balcón del Ayuntamientu de la capital, insultado al Presidente del Gobiernu, señor Areces, a Xixón y al Sporting son eso, faltosaes y babayaes, pero desurden un mal más profundu.
En primer llugar, denoten la falta de xacíu, de séntíu común, de dambos futbolistes: hai coses que -entá diciendo babayaes o siendo groseru- pueden emitise n'algunos sitios o ámbitos, pero non en otros, de más prestancia, solemnidá o representación. Dicho con claridá, ún puede rutiar cuando ta solu en casa, pero facelo nuna comida ente amigos ye una grosería; y si ye yá nuna cena de gala, dizlo too sobre'l que lo fai.
Per otru llau, lo que fain les sos palabres nun ye más que repetir espresiones y conductes inciviles que son tan frecuentes ente esa magaya que ye un parte pequeña (pero parte y sonora) de los espectadores que se mueven na rodiada del fútbol (del Sporting, del Uviéu y de tolos clubes de fútbol): una conducta y una visión del mundu enfermos, y daqué peor entovía.
En tercer llugar, eses faltosaes traducen l'espíritu de corripia (yá al marxen del fútbol) qu'apreta y afuega a tantos asturianos, que creen que lo que nun ye'l so pueblu nun esiste (o que ye l'enemigu), y que constituye, esi espíritu de corripia, ún de los grandes problemes de los asturianos, polo que somos incapaces de xuntanos, de venos como un conxuntu, y que nos lleva, como consecuencia d'ello, a que nun nos faga casu ningún gobiernu y a que'l restu d`España nun sepa de la nuestra esistencia, coles consecuencies obvies en riqueza y empléu.
Finalmente, tanto l'Ayuntamientu d'Uviéu, como Gabino de Lorenzo tán teniendo un comportamientu mui inaceptable al venir a dar cobertura a eses conductes inciviles mediante'l procedimientu de venir a buscar causes "oxetives" pa ello. Nada xustifica l'insultu al Presidente Areces, anque
esti actuase, a la fin del partíu del Sporting, como un Berlusconi cualquiera sentándose nel llugar del entrenador pa les ruedes de prensa; nada xustifica l'insultu al Sporting, nada los destrozos.
Por cierto, y anque soi yo'l másimu críticu de la TPA pol so antiasturianismu y el so desconocimientu d'Asturies, tó decir que'l tratamientu que dio a los dos partíos, el del Uviéu y el Sporting fue esquisitu y esquisitamente igual, y que, por una vegada, fízolo bien, al menos, nesi aspectu.
