Si se lleva a términu l'alcuerdu de la Comisión de Turismo, Industria y Comercio del Congresu, y si dempués, convertidos los sos mandatos en llei, la llei se cumple y les alministraciones públiques nun s'escatamucen de ponela en práctica, el 23 de marzu de 2010 va ser un día notable pa la economía española. Según esto, el plazu pa pagar a los proveedores va baxar de los actuales 60 díes (poques vegaes cumplíos) de norma xeneral (en la práctica yera llueu a 90, 120 o más).
Pues bien, la demora nel pagu va quedar amenorgada a 30 díes, eso sí, a comienzos del 2013. Mentestantu establécense tramos de tránsitu: a 55 díes a la entrada en vigor de la nueva llexislación, a 50 a partir del 1 de xineru de 2011, a 40 nel 2012 y, por fin, 30 díes al entamar el 13.
Claro que la dicha nun ye completa, porque -dicen les empreses- "¡Qué llargo me lo fiáis!". Y, amás, puede ser que munches nun vean esi día, afogaes enantes poles deldes de l'Alministración.
Y lo qu'ún s'entruga ye: ¿Y POR QUÉ SE DEXÓ CORRER TANTOS AÑOS ESTA ROÍNA ECONÓMICA, ESTI AUTÉNTICU ATRACU A MANO ARMADA?
¿Quieren que-yos lo diga? Porque la mayoría los políticos -y, dende llueu, los partíos votaos con más entusiasmu polos ciudadanos- nun sólo marafundiaben les perres en obres ensin sentíu o en volaores pa les fiestes, sinón que, sobre malbaratar lo que teníen, gastaben asina lo que nun teníen.
D'esa miente, encantaos porque los llevasen a la ruina, los ciudadanos (y los empresarios arruinaos tamién) votaben a los mesmos que los arruinaben, n'agradecimientu polo bien que esbadayaben les sos perres.
¡PUES A ESCONSOÑAR, CIUDADANOS Y CIUDADANES, QUE QUEDEN NÁ MÁS QUE LOS DÍES SEÑALAOS NEL CONTADOR D'EQUÍ AL DELLÁU!
1 comentario:
mala noticia nun ye ,,, lo verdaderamente importante diba ser que les administraciones publiques dexaran de gastar les perres de los ciudadanos con tanta arrogancia (comu dixo la menistra aquella del PZOE el dinero publico no es de nadie ) ,,, eso si diba ser un "turning point" ...
Publicar un comentario