Nel 2008, con motivu del segundu centenariu de la proclama antinapoleónica pola Xunta Xeneral del Principáu, la Jjjunta Gggeneral del Principadooo celebró una esposición sobre dellos asuntos y personaxes de daquella. Con un puntu de vista un migayín asturianu la esposición tendríase fecho d'otra forma; pero, en fin, nuna Jjjunta Gggeneral del Principadooo tan poco asturiana y ocupada por partíos centralistes-madrileñistes eso yera materia imposible, como pedi-y peres al olmu o fragancia al cuchu.
Pero vamos dexalo de llau y venir a otra cosa: nel 2009, la propia Jjjunta editó un llibru-catálogu onde se recoyía aquella esposición, del que ye responsable la Directora de la Biblioteca de la Jjjunta, doña Josefina Velasco Rozado, que, per otru llau, vien faciendo un magníficu trabayu como tala.Agora bien, el llibru-catálogu contién un par de despropósitos que son, en realidá, illegalidaes. De mano, vamos dexar pa prau el que'l testu tea na más que nuna de los dos llingües del país, en castellán (y nun ye poca cosa dexalo pa prau, porque si n'Asturies nun miramos pa l'asturianu, ónde lo van facer, ¿n'Andalucía? ¿En Grecia? ¿En Caggtilla-La Mancha?).
Pero, amás d'eso (y nun ye cosa roína), ocurre que tolos topónimos del testu tán falsificaos, esto ye, en castellanu, cuando la Llei d'Usu y Promoción (afalada pola mio persona y pol PAS, por cierto), aprobada nel 1998 na Jjjunta, establez tasativamente que: “Los topónimos de la Comunidad Autónoma del Principado de Asturias tendrán la denominación oficial en su forma tradicional.” (art. 15)
Per otru llau, tanto'l Muséu de Belles Artes d'Asturies, como el Muséu del Pueblu d'Asturies tienen, al menos, una denominación billingüe oficial (que, por cierto, yo tamién empobiné como representante del PAS). L'aprobación de la primera de les denominaciones aprobóla nel so día la Xunta Gobiernu la institución rectora'l Muséu, onde ta representada la Jjjunta. La segunda, aprobóla, a iniciativa del PAS, la propia Jjjunta Gggeneral del Principadooo.
Pero val más asina: que quede ñidio y bultable que la política y les instituciones asturianes tán nes manes nun sólo de partíos palafreneros de Madrid, sinón en manes de xente con cultura y mentalidá castellano-centralista-mesetaria.
Porque doña Josefina, a la qu'estimo, nun ye la responsable última d'esti disparate cultural y d'esta moñicada llegal: podemos entender que, nesti aspectu, llimítase a facer lo que-y manden. Responsables, sonlo los partíos y les persones (IU, PP, PSOE) que nun solo dieren l'aprobación a too ello, sinón que lo aplaudieren coles oreyes. Porque, ¿qué son ellos más qu'eso? Y son tan ello, que —de xuru— nin siquier cayeren na cuenta de la moñicada o s'estrañaren d'ella. Los primeros, los d'IU, que tanto mienten y enfallenten, ente paraxismos y ximuestres.
¡Y que son Gobiernu!
No hay comentarios:
Publicar un comentario