Cada añu, los socios de Volver al Pedreru celebramos una espicha pa fomentar l'espíritu de xeremandía (y la gota y el colesterol... y otres llaceries mui aponderaes polos mélicos).
L'asociación tien como finalidá la defensa de l'actividá tradicional de pesca nel pedreru de la xente que nun ye profesional, de los asturianos de toa mena y condición.
Gracies a Volver al Pedreru, los asturianos pudieren volver al pedreru a pescar pulpu (primero ún, dempués dos) y conseguimos abrir septiembre pa los pulpos (que ye un bon mes pa ello).
(Na semeya: Alberto Vizcaino, director xeneral de Pesca Marítima del Principáu; Xesús Cañedo, secretariu del PAS; Xuan Xosé Sánchez, presidente del PAS; Dimas García, presidente de la Federación de Cofradies de Pescadores d'Asturias; Aquilino Menéndez, presidente de l'Asociación Volver al Pedreru y José Manuel Valdés, secretariu l'Asociación Volver al Pedreru.)
Dende fai tiempu venimos reuniéndonos colos responsables detolos gobiernos pa conseguir aumentar el númeru o kilos de les especies pescables. En dalgunos casos conseguimos coses y n'otres, non. Nes feches prósimes vamos volver a intentalo col nuevu gobiernu.
Per otru llau, la nuestra presencia y mediación solventó coses importantes pa los pescadores de El Musel y tamién ayudó a solventar meyores pa los aficionaos de la caña.
En cualquier casu, seguimos lluchando pa conseguir facer sentir la voz del pueblu, de los pescadores deportivos de mar, y pa defender que podamos facer actividaes que lleven miles d'años faciendo los nuestros antepasaos.
Una información de la espicha d'ayer nel llagar de Sidra Gelo -que nos lu presta amablemente, como siempre- puede vese en http://quintes.blogspot.com.es, de Julián Caicoya Tuero, corresponsal de El Comerciu na zona, cuya ye la semeya qu'adxuntamos.
Aprovecho equí pa da-y a él les gracies, asina como a los propietarios del llocal (y perbona sidre) y a tola xente (especialmente a Aquilino) de Volver al Pedreru y Quintes que collaboró pa montar y desmontar, sina como pa llevar lo muuncho que sobró a la Cocina Económica.
No hay comentarios:
Publicar un comentario