Un par de coses de faces estremes, al respective. La primera, ¿qué más da qu'entraren o nun entraren mozos que nun podíen entrar por nun tener 18 años? ¿Diba ser distintu'l númeru d'asistentes si en llugar d'entrar rapacetos entren rapazonos?
¿Qué más da qu'hubiere 50 o 70 persones de control o xixilancia? ¿Daquién ye capaz de caltener un grupu de miles de persones cuando echa a correr?
¿Qué más da que fueren 9.000 los asistentes o 11.000? Daquién cree que se puede garantizar l'orden y el control con varios miles de persones acorripiaes?
Non, el problema ta n'otru sitiu: ¿Cómo ye que se puede pensar que nun ye un milagru'l que nun pase nada cuando s'acorraxen varios miles de persones apitiguñaes pa beber, drogase en dalgunos casos, alloriar cola música en toos?
Y más, ¿cuálos son el gustu y el xacíu d'atropase pa nun poder movese, pa que tarden mil hores en ponete una copa, pa nun poder falar col del delláu, pa perder el control del espaciu onde tas? A partir d'equí, tolo demás.
Y en segundu llugar, un camientu: ¿Cómo ye posible que la rodiella siguiese funcionando dos hores más dempués de producise la catástrofe, con tres muertes (inicialmente) y dellos mancaos graves? ¿Prudencia durante dos hores? ¿Negociu? ¿Absoluta indiferencia pola vida de los demás? Yo alcuérdome en Nava, el día que mataren a Ángel Blanco, que yera la folixa de la sidre en Nava. Fue hacia les 4 o les 5 la tarde cuando aportó la noticia. Los "responsables" decidieren que yera meyor seguir la folixa, ente otros argumentos con esi tan vaciu de que "pa que nun paeza que ganen ellos" (los d'ETA). Un argumentu tantes vegaes repetíu, tan valeru de conteníu real (esto ye, ensin designar ninguna realidá efectivamente esistente, ninguna relación concreta col mundu, dalu efectu sobre él), tan encanalláu nel fondu.
(Por cierto, aquel día dalgunos llargamos al galopiu.)
No hay comentarios:
Publicar un comentario