Como memoria de Nené Losada, figura a la que se-y dedica esta vixésimo cuarta Selmana de les Lletres Asturianes, dexo equí constancia de la necrolóxica que nel so día asoleyé nesti blog, onde s'enxerten un par de testos d'ella.

Acaba de morrésenos Nené Losada Rico, matriarca de les lletres asturianes y estupenda escritora. Al marxen del so méritu lliterariu, Nené arreyaba una amplia reconocencia social de los sos méritos y persona, tanto nel so conceyu, Valdés, como nel conxuntu d'Asturies. Sobre dexar equí constancia del nuestru afectu y almiración, queremos ofrecer tamién el nuestru sentir a la so familia y especialmente al so fíu, Juan Antonio. Pa ello, nada meyor qu'un par de testos de so:

Medréi ya fíxeme moza
en el pueblu de Sanfliz
ya agora, desde Lluarca,
en recuerdu falo así.

Durmo col sueñu despiertu

como apigarzando.

Nené Losada col autor

Escurez aína na miou ventana,

pero empuxa l’amanecida;

quier entrar la l.luz,

peme que nun podrá sin ayuda,

pero’l miou sueñu,

inda despiertu,

nun tien priesa,

siéntese a gustu.

Pola rendixa de la ventana

cólase’l fumu de la l.luz;

a non tardar el fueu,

el de la gran l.luminaria

que calez el día;

tendréi que deixalu entrar,

tien priesa.

A la nueite,

col sueñu despiertu,

volveréi soñar

entre apigarzos.