Ayer asoleyaba un ensiertu tituláu "Finlandia y la educación", que tienen equí abaxu. Si no lu recuerden o conocen, lléanlu. Consiste nuna serie d'elementales de la enseñanza, d'actitudes y cuestiones previes a cualquier procesu d'enseñanza o d'educación. Sobre ello ¿fala dalgún d'esos que pasen los díes roñándonos cola relixón?, ¿diz daqué dalgún de los que fieden colo del catalán?, ¿pídelo dalgún d'esos que pasen les hores boriando cola "calidá de la enseñanza"?, ¿sopeléxenlo los que nos allorien colo de la discriminación, la igualdá, y lo de "el fíu del obreru a la universidá"?, ¿dalgún d'esos derechos y deberes elementales formen parte del discursu de los cafiantes colo de los "derechos" y la "perda de derechos"? ¿Falaba d'ello la LOGSE? ¿Trata nello la LOMCE?
Como Celso Amieva escribió un bon día n'Argelès sur Mer, ¡mayen bringos!
Según todos los informes, Finlandia ye'l país onde meyores son los resultaos de los alumnos y onde más s'estima a los profesores.
Preguntes sencillines: ¿En Finlandia tien que pasar un profesor un altu porcentaxe de la clase mandando callar a los escolinos, mandándolos sentase, quitándo-yos el móvil y pidiéndo-yos que trabayen? ¿En Finlandia, como equí, hai qu'aguantar a un alumnu qu'alborota e impide a los demás atender la clase, según ocurre equí, sin poder, además, en principiu, nin echalu al pasillu? ¿En Finlandia la policía lleva a clase al rapaz que nun quier tar y que pasa'l día alborotando y molestando a los demás, pa que siga alborotando y molestando a los demás? ¿En Finlandia entendieren los tribunales superiores -los interprétes últimos de la Constitución- que'l derechu a la educación consiste na obligación de tar encerráu nel aula tol horariu escolar, tocando los co... a tolo mundu?
Porque too esto son cuestiones previes pa falar de la educación y la enseñanza. Pa deprender fai falta poner la voluntá de facelo, aprovechar el tiempu, tener un ambiente afayaízu pa ello en clase y escuchar al que sabe, que ye'l profesor. Ensin esos mínimos nun hai rendimientu escolar, y menos "educación".
No hay comentarios:
Publicar un comentario