L'otru día anduve 24 hores, de llunes a martes con un mapa pa controlame tensión y ritmu cardiacu. Nun s'alegren (o sí, depende), porque too fue normal. Salvo un picu a les 8 la nueche.
Esi picu coincidió cola mio entrada nun chigre a esa hora pa tomar un vinu (curiosín, por supuestu). Che una goyada a la tele (TVE1), taben dando un programa de cocina y miré pal rótulu onde desplicaben cómo se facía la receta, y tardé más de mediu minutu n'enterame lo que quería decir. Ponía: "Ponemos el trigo en una hoya con dos cucharadas de sal".
¡Mediu minutu! Eso fue lo que tardé en decatame que lo que debía poner yera: "Ponemos el trigo en una olla con dos cucharadas de sal".
Asina que, de mano, cuando me dieron los resultaos del mapa y me señalaren el "picu" de tensión yo taba por cha-y la culpa al vinu, bueno, a les ganes de tomalu, qu'entá nun me lu teníen puestu, pero agora pienso más bien que la causa debió ser la ortografía de la TVE1.
Asina qu'agora toi consultando colos mios abogaos (dizse asina polos del impudor, anque nun tenga ún más qu'ún, y gracies) si demandar a TVE.
Y, por cierto, güei que ye'l trixéximu quintu Día de les Lletres Asturianes, ¿cuántes vegaes nun andamos boriando si talu o cualu apóstrofu falta n'asturianu, o si ta una "u" por una "o"? ¡Muncho tenemos que deprender (de tolerancia) de la llingua oficial del Estáu! Como yo recordaba, por exemplu, l'otru día, si ún ye responsable de la cultura n'Asturies y fala en castellanu, puede permitise decir "36 edición", envede "trixésimo sesta". ¡Asina que cómo nun vamos facer la vista gorda colo de la nuestra llingua!
No hay comentarios:
Publicar un comentario