Vengo diciendo fai tiempu que los asturianos tenemos un problema al final de la cadena sidrera: el preciu al cliente, escandalosamente baratu. El problema repercute al principiu la cadena, la manzana y l'acollechador: col preciu final de venta, el preciu pagáu por quilu de mazana asturiana tien que tar siempre mui per baxo de los costos de producción (ensin contar inversión nin rendimientu'l capital). Asina ye que cada vegada hai menos mazana asturiana (pesie a les plantaciones industriales) y que tán desapaeciendo los cultivadores tradicionales y morriendo o enllenándose d'arfueyu les pumaraes.
Esti fin de selmana pasáu asoleyó La Nueva España un reportaxe onde se decía que la producción de gallegos y vascos taba espolletando y que tenía una presencia grande nos mercaos americanos. Pues bien, ellí dábase cuenta del preciu de la botella de sidre en Galicia (desde 3,50) y nel País Vascu (dende 3,80). Como ven la diferencia ye bien clara. Agora, si quieren ver qué pasa cola nuestra mazana y cuálos son los costos de producción pueden pinchar nestos dos arreyos qu'acabamos de llantar.
No hay comentarios:
Publicar un comentario