Acabo de velo na Voz de Galicia, nun artículu de Roberto L. Blanco Valdés, al que los remito (¿Piensa votar? ¡Pues pase de campaña!), porque nun sé si ye la edá o qué, pero mirar pa les campañes electorales da murnia, alloria ún y, al final, encurrina y ablaya. Toes (les campañes) y toos (los candidatos) son iguales: dicen tochures y bocayaes pa tochos y babayos. Y eso ye dafechamente deprimente.
Pero más deprimente ye pensar que, a lo meyor, nun tán enquivocaos, y que toes eses tochures y babayaes funcionen.
De toes maneres, como nun quiero que me tengan por fatu nin quiero tampoco empeorar la mio opinión (o sea, el mio conocimientu) de la triba humana, pues fago lo que fago: nun mirar pa ellos hasta la hora de votar. En cualquier casu, vayan facer vustedes lo que vayan facer, y como los tengo a toos por xente culta e intelixente, recomiéndo-yos lleer l'artículu de Roberto L. Blanco Valdés, y dempués, naturalmente, facer lo que-yos pete.
No hay comentarios:
Publicar un comentario