Si-yos interesase l'asturianu pa daqué más que p'adondar males concencies

y p'atropar incautos (pocos, puen contase colos deos de la mano).

Velahí dalgunes coses que se podíen negociar pa impulsar la normalización social del asturianu (l'artículu asoleyóse en La Nueva España del 14/06/2015).

L’APRECEDERU

¿OFICIALIDÁ?: ¡EXEMPLARIDÁ!

Dalgunos asturianistes anden contentos porque creen contar na Xunta Xeneral hasta 17 partidarios de la oficialidá del asturianu. Son mui optimistes. Si s’examinen les declaraciones a LA NUEVA ESPAÑA de los candidatos, vese que la mayoría de les respuestes aparentemente positives son en realidá un “yá veremos”.

En tou casu nun ye’l de la oficialidá’l problema principal que tien l’asturianu. Nun fai falta más que ver los programes de la TPA nos pueblos y ver que la mayoría respuenden en castellanu o oculten la so llingua. Abonda con dir a llugares onde fai diez o quince años tolos neños falaben un daqué n’asturianu y ver cómo ye agora’l castellanu la llingua de les nueves xeneraciones. Abasta con entrugar a les families falantes d’asturianu pa que nos digan que nun consiguen que los fíos falen mas qu’en castellanu.

Y ye que fai tiempu que la llingua familiar nun ye la llingua materna. La llingua materna ye agora’l castellanu de la guardería y el preescolar, la de Mickey Mouse, Dora, los xuegos del móvil, la tableta o la play. Inclusu, pa los qu’estudien asturianu, la nuestra nun ye una llingua ambiental, sinón una especie de llingua estranxera o de curiosidá.

El problema que tien l’asturianu nun ye d’oficialidá, sinón d’exemplaridá: de vela viva, como una llingua ambiental. La oficialidá, nesi sentíu, nun ye más qu’una pía xaculatoria.

Y, pa empezar, ¿qué exemplaridá ye la d’unos diputaos y partíos a los que nun se siente una palabra n’asturianu nos actos públicos? ¿Quién va a tener como daqué valioso una llingua que refuguen nel usu?

Per otru llau, empeñase na oficialidá, que nun se va conseguir, tien más d’escapatoria que d’otra cosa: negóciense coses concretes pa la exemplaridá: la RPA; los informativos, el deporte y los magazines de la TPA; un plan pa guarderíes y preescolar.

Pero vese que nun se-y dedicó un minutu al problema o que-yos basta cola xaculatoria, que ye lo que ruxe y da votos.