Acabo de recibir El Baluarte, la revista anual de los Amigos de Cuideiro / Cudillero. Magníficu, como siempre, perprestosamente editáu, y, esti añu, con materies más interesantes que nunca, al mio parecer.
Güei quiero destacar un retayu de l'Amuravela de 1966, que, aparte de prestosa, ye, como siempre un documentu etnográficu e históricu. El retayu ye sobre'l tiempu meteorolóxicu (sobre l'otru, sobre "los tiempos" d'aquel presente, tien información abonda y prestosa, pero esi ye otru tema), y esti ye:
L'iviarnu nun tuvu fríu
que la niavi nun la viamus,
peru tanta agua caéu
que, ¡mi alma!, deluviamus;
¡hasta n'as didas del pía
tiníamos mofu naciandu.
La premavera, variabili:
aguas, viantus ya caloris...
todu anda istramboriáu.
¿Qué-yos paez? ¿Asemeyáse aquel 1965-1966 a esti 2016-2017? (¡Yá vendrá l'agua, yá!). El tiempu, como puen ver, siempre ta llocu, "istramboriáu". Nunca ye como tien que ser. De mou y manera que ye como la nuestra memoria: él inxamás camuda, siempre camuda; y la nuestra memoria ("mentirosa memoria" diz un poema d'Antón García) inxamás camuda: siempre cree que'l tiempu que camuda ye una novedá, que'l tiempu anda llocu, "istramboriáu".
Bueno, camiento que yá sabrán que la escritura de l'Amuravela fue siempre d'Elvira Bravo Fernández-Ahuja, y que'l so recitador yera Juan Luis Álvarez Bravo, "Totó".
No hay comentarios:
Publicar un comentario