Nun paren d'aportame felicitaciones pol recién salíu Diccionariu asturianu-castellanu (964 páxines en tipu 9). La verdá ye que, dexando de llau lo que puedan tener d'esaxeraes o combayones eses opiniones, al llegar de xente que me conoz directamente (anque nun-yos pido yo la so opinión y saben que nun tienen por qué dámela, y, polo tanto, nun tán obligaos a nada) tienen un fondu de verdá: toi percontentu cola obra, col esfuerzu, col trabayu y col llogru.
De mou y manera que viénenme a la cabeza les palabres del vieyu Simeón en Lluques, 2, 29, cuando'l paisanu ve llegar a Xesús al templu pa la presentación y la circuncisión y diz: "Nunc dimittis servum tuum Domine".
Mutatis mutandis, naturalmente, porque ún puede sentise yá satisfechu del trabayu la so vida. Razonablemente satisfechu.
Pero que naide s'entusiasme, que nun pienso entá dimitime, esto ye, empobiname. Ente otres coses, pa que naide nun disfrute demasiao por ello.
Asina qu'ún daqué más faremos.
1 comentario:
¡Coime, Xuan! Nun sabía que tuvieras tantas felicitaciones que yá les cuentes por páxines. Entá nun tuve ocasión de ver el to llibru (equí n'España la cultura asturiana nun esiste), pero prometo mercalo cuando té per Asturies. Un saludu dende la Corte.
Publicar un comentario