¡Fenómenos!

Estos rapazos son unos fenómenos. De la mentira, de la ficción y de la imaxinación.

El sábadu 23 hebo mitín del PSOE en Xixón, con Felipe González y too. Escuchen:

Primera. De Javier Fernández, col que pretenden, en sustituyendo a Areces, volver ilusionar y engañar a los incautos (como si Javier Fernández nun fuera tan responsable de les polítiques del Gobiernu como Areces, y más culpable qu'elli nel desastre de la financiación p'Asturies). La verdá ye que-y echa imaxinación. Apunten el palabru: "turbocapitalismo", que vendría ser como la hostia rehostia, pero más hostiferante.

Segunda. "Vicente Álvarez Areces -diz un periódicu- asegura que los populares asturianos han pretendido "reventar" el proyecto de El Musel". ¿Pero nun fueren Los Verdes los que denunciaren el proyectu n'Europa? Sí. ¿Pero nun son Los Verdes parte de la coalición de IU-BIA-Los Verdes? Sí. ¿Pero nun ta IU nel Gobiernu con Areces, y, incluso, tienen cargos de Los Verdes al frente d'estayes gubernamentales? Sí. ¿Pero, entós, nun ye'l propiu Gobiernu'l qu'echara p'atrás n'Europa'l proyectu d'El Musel? Sí.

¿Ya entós?

Yá despliqué munches vegaes que, en viendo que los siguen votando una y otra vegada, a pesar del desastre que son, los socialistes piensen que los sos votantes deben ser talo como paecen, y, en consecuencia, deciden tratalos como talos.

Pero nin tanto nin tan calvo. Nun suel ser la intelixencia lo que falla a los ciudadanos, sinón la emocionalidá.

D'otra forma fue la intervención del ex Presidente del Gobiernu, don Felipe González. Esti lo que vieno fue a desvelar la verdá. "Me costó mucho defender el mercado ante mis amigos asturianos". Esto ye, y dicho a les clares: vieno a sorrayar l'arcaísmu de los socialistes asturianos, el so enfotu en vivir d'espaldes al mundu y contra'l mundu, el so calter arcaicu, conservador y reaccionariu. Y la consecuencia: l'atrasu, paru y emigración que tolos asturianos -los votantes del PSOE y los non votantes- pagamos por ello.

Gracies, "Isidoro".