Nel suplementu "Cultura" de La Nueva España (13/10/11), publica Antón García una crítica que, col nome de "Realidaes inquietantes" fai la reseña del caberu llibru de Vicente García Oliva. Yá que sal, yo, que tengo'l llibru enriba la mesita y toi lleéndolu, aprovecho pa dala a conocer equí y decir que la suscribo dafechu, al tiempu que recomiendo la llectura del llibru, interesante y amena. El llibru ye una reedición de la editorial Trabe, dientro la colección C&C, y atropa un conxuntu de 40 relatos.
En 1991 publicaba la editorial Llibros del Pexe, nún de les primeres entregues de la colección «Puzzle», un conxuntu de cuentos de Vicente García Oliva que se titulaba El Norte. Dos décades más tarde aprovecha l'autor la iniciativa de Trabe de reeditar aquel llibru pa, col mesmu títulu, reunir nun volume'l conxuntu de la so producción cuentística: trenta y cinco años de narrativa curtía, que son a la vez los de la historia lliteraria personal de García Oliva y los que tien el modernu relatu breve n'asturianu. D'esi momentu fundacional l’autor forma parte xunto con dalgunos otros nomes (Sánchez Vicente, Rubiera, Nel Amaro, Solís Santos, González-Quevedo o Andrés Solar...). Tien razón Oliva al quexase, na nota que pon al frente de los cuentos, de la inxusta etiqueta de «lliteratura militante» con que se despacha a aquellos primeros creadores de los años setenta. Pero quiciabes convenga recordar qu'esa etiqueta, echada a rodar hacia 1986 falando d'escritura «comprometida social y políticamente» (y non militante, que nun ye lo mesmo), referíase a la poesía d'aquel tiempu, y non a la narrativa, anque depués venga repitiéndose como una divisa fácil, por cómoda, pa tola lliteratura d'aquel grupu.
Cuando publica la primer edición d'esti llibru, Vicente García Oliva (Xixón, 1944) ya yera conocíu como fundador de Conceyu Bable y como miembru de l'Academia de la Llingua Asturiana. Llevaba editaos unos cuantos llibros de narrativa infantil y xuvenil y una novela, L'aire les castañes (1989). Pero tamién tenía un méritu más, anque poques veces se-y reconociera: yera l’autor d'ún de los cuentos más destacaos d'ente los que se publicaron nesta llingua nos años setenta, el que lleva por títulu «Los gatos», y qu'abre tanto la edición de 1991 como esta d'agora. Frente al didactismu, bastante común nel cuentu d'aquel tiempu, esti textu ye un relatu cenciellu y intelixente, qu'inaugura ente nos el camín de lo que podemos llamar la «narrativa inquietante», y que, pura lliteratura, sigue lleéndose güei col mesmu asombru que naquellos años.
Ordenaos de manera cronolóxica a partir d'esti relatu, podemos alvertir nestos cuentos la manera na que l’oficiu narrativu d'Oliva s'afianza y madura, al tiempu que la llingua gana seguridá expresiva. Una parte importante de los cuarenta cuentos del llibru, seguramente los meyores, desenvuélvense a partir d'una situación cotidiana, descrita con ciertu detalle, hasta que l'azar (un elementu fundamental na narrativa de García Oliva, posiblemente con raigañu en Cortázar) conduz a un planu irracional. En munchos de los textos nun se resuelve'l misteriu que se plantexa, abriendo una brecha d'inquietú nel llector.
No hay comentarios:
Publicar un comentario