Los del aduar (autodenomaos del 15-M) y los periodistes que ven nellos el viagra revolucionariu perdíu na xuventú (nesti país siempre hai daquién con una revolución pendiente) anden toos entusiasmaos coles sos propuestes (coles sos babayaes, en realidá) sobre la reforma democrática, les reducciones de diputaos y cargos públicos, etc.
Naturalmente, los llistos cuerren apuntase a esi carru. Asina, PP y PSOE tán d'alcuerdu en reducir los escaños del Congresu; Esperanza Aguirre va a facir llistes abiertes en distritos uninominales, etc. ¿Saben a ónde lleva too ello? A poner entá más difícil la entrada de les minoríes nos parlamentos, a poneles a piques d'esapaecer. Asina qu'aprovechando l'impulsu de los "llistos" (de picu) los llistos de verdá faen el so agostu y engorden la so cuenta resultaos.
Y, mentestantu, PSOE y PP pactaren hai pocos meses (camiento que col sofitu d'IU, pero nun lo sé) que los partíos que nun tengan representación parllamentaria tengan que recoyer firmes pa poder presentase a les elecciones. Esto ye, un nuevu obstáculu pa eliminar la perda de votos y concentralos nos "gochos gordos" (yá se sabe lo que diz el refrán asturianu. "al gochu gordu, untá-y el rau").
¿Importa too esto a los del aduar y a los sos palanganeros mediáticos? ¡Qué va! Ellos tan contentos con sentir l'ecu de los sos rutios parademocráticos y metafísicos nos medios de comunicación.
No hay comentarios:
Publicar un comentario