Regálo-yos esti sonetu festivu-pesquín, fechu pa vustedes, con estribote y too.
Llevántome mui ceo esta mañana
Y cuelo de mio casa cola albancia.
Vo pa la mar y llevo la esperanza
D’apinar un copín pescando a caña.
Ta d’orbayu: tantísima araña
Tendió rede en camín, que la so tanza
De filu pegañosu ensin tardanza
Pa pescame la cara dase maña.
Cerca una cuadra acuérrenme les mosques,
Y un magüetu d’esmenu quier venise;
Al echame pa un llau dando un surtíu,
Escáyome nun artu. ¡Toi galdíu!:
Si esto son badagüeyos, val más dise
Enantes d’entamar, qu’ente les roques
Nun quisiere dexar, por gustu míu,
Los anzuelos, los chombos y el sentíu.
No hay comentarios:
Publicar un comentario