La sidra de Nava es la pera

Según informa La Nueva España (12/03/2012), por fin va salir la sidre de pera qu'anunciara un llagar de Nava. Hemos probala.

Por cierto, queremos repetir que lo de la sidre de pera nun ye un inventu reciente. Polo contrario, siempre se fizo y yera nel pasáu mui apreciada. Al respective, pueden vese los mios dos ensiertos del 07/07/2010 y 06/10/2011.

(Por cierto, a propósitu de la noticia, dalgún de los llistos oficiales y permanentes d'esti país dixo les babayaes de rigor, quexándose del tracamundiu los tiempos y "los inventos modernos". Yá se sabe, una parte del asturianismu -nacionalista o social, esto ye, más bien madrileñista y centraliegu pero "más asturiano que nadie" nun ye más qu'aldeanismu atrevíu).

Y agora la cita:

Hacia 1711, fray Toribio de Santo Tomás y Pumarada daba recomendaciones a los sos parientes de Colunga sobre cómo facer la sidre, col oxetivu tanto d'atender a les necesidaes de la casa como pa la venta y ganancia.

El primer conseyu que da ye mayar aparte lo podre colo podre (de mazana y de pera) y lo sano colo sano, y entá, dientro d'esto, lo meyor separao de lo más villano (el porgüeyu ye conseguir más perres, pola calidá, na venta de los llicores).

Tola sidre, na so opinión tien que ser de pera y mazana, amestao, pero "pero nunca eches sino mitad de pera, y tercera parte es lo bastante para doblar el precio sobre lo que sea pura manzana".

Nun fará falta deci-y al llector intelixente que lo que Pumarada ta indicando ye que la sidre más apreciada ye la que tenía pera y non solo mazana.

Y, dempués, da otros conseyos pa mayar la sidre, pa llevala a les pipes onde se faga y pa dir atentiéndola, atestongandao na llimpieza estrema pal llagar, pa los vasos, pal trasiegu hasta les pipes, etc.

A continuación da otros conseyos sobre cómo char madre a la sidre y recebalo (y equí hai dalguna sorpresa pa vustedes, al comparalo colo que se suel facer güei). Pero eso queda pa otru día.