Yá saben que fai unos años atopóse "un milagru". Un home de fai unos 5.300 años que morriera desangráu a consecuencia d'un flechazu nel costazu, a unos 3.000 metros d'altura. Topárenlu unos escursionistes al desconxelase parcialmente un glaciar (lo que quier decir que'l cambéu climáticu ye pa volver al tiempu d'enantes, polo menos).
Cada ciertu tiempu, dánsenos noticies d'él, y faense supuestos sobre'l so mou de vida. Conservóse, por exemplu, el so arcu y dalgunos aperios de so. Sábemos tamién que lu mataren (o que lu asesinaren). Sobre esti caberu aspectu, la so muerte, hai delles teoríes que pueden ver nos llugares a los que los empobinamos coles nuestres direcciones citaes.
Per vía de broma: ye posible que lu mandare asesinar la muyer. Siendo'l paisanu abondo vieyu pa lo normal na época (45 años), de suponer que se casara con una mozuca qu'esperaba heredalu a la so muerte (yá saben el canciu: "yo caséme con un vieyu / por farteme de reír..." y, sobre too, aquel otru que reza: "caséme con un vieyu / pola moneda. / La moneda s'acaba / y el vieyu queda"), y de suponer que taba farta de velu perdurar ensin acabase, ye posible que pagara a un par de sicarios pol llabor d'esanicialu, cola promesa de paga-yos, por exemplu, con un par de pelleyes d'osu cavernariu y, quiciabis, daqué favorucu.
En tou casu, la nodicia güei ye que sabemos más coses del so xenoma (ta emparentáu con xente de Córcega y Cerdeña), de la so salú (les arteries a puntu españar de colesterol, tenía parásitos intestinales, carecía d'intolerancia a la llactosa).
¡Ah! Per otru llau, y enantes de que pasen a les direcciones que-yos apurrimos, pa más detalles: ¿nun-yos paez (na semeya de la so reconstrucción facial) que yá lu viéramos, a esi paisanu concretu, per exemplu, pelos Montes de Sevares o per El Sueve, equí n'Asturies? ¿A que sí?
(Los enllaces que vienen darréu tienen información complementaria.)
No hay comentarios:
Publicar un comentario