Sánchez Vicente: "Na campaña eleutoral nun se ta tocando nin un solu tema d’interés p’Asturies"
El 25 de marzu Asturies tien una cita nueva coles urnes. Xuan Xosé Sánchez Vicente (Xixón, 1949), presidente del PAS, escritor y comentarista políticu, faló con Asturies.com de l’actualidá del país.
¿Qué-y paez el desarrollu que ta teniendo la campaña eleutoral hasta’l momentu?
Una riestra rutiazucos de tópicos insulsos.
¿Tán tratándose temes d’interés p’Asturies o más bien ye una campaña venceyada a los intereses de los partíos estatales?
Creo que nun se ta tocando nin un solu tema d’interés p’Asturies. Lo único que se fai, por toos, ye repetir les posiciones de caún nel tableru d’España. Eso incluye a Foro y a IU.
¿Qué papel tien l’asturianismu nesti contestu?
Pues, prácticamente ningún. Y, anque lu quisiere tener o s’esforzare nello, ye dafechamente invisible pa la población.
¿Cree que Foro pue considerase un partíu rexonalista/asturianista?
Nun paez otra cosa qu’una versión del PP, más la palabra ‘Asturias’, pero ensin ningún conteníu asturianu/asturianista/nacionalista. El so discursu ye’l discursu casquista, nada más, per agora.
¿Ve a la formación de Francisco Álvarez-Cascos como un partíu de llargu percorríu o cree que ta condergáu a tornar al PP?
Eso, ¿quién lo sabe? Depende de los resultaos d’estes y de les prósimes, asina como de la propia persona de Cascos. Ensin él, Foro esapaez.
La encuesta del CIS da como ganador al PSOE y prevé la entrada d’UPyD na Xunta Xeneral, que sería llave de gobiernu. ¿Confía en que se dean estos resultaos el 25-M?Yá lo veremos. Yo creo que nin los electores, una parte importante, sabe si va votar nin lo que va votar.
¿De qué color va ser l’Executivu próximu?
Pues nun lo sé. En ningún casu, nin asturianu (política y culturalmente, claro; sí personal o geográficamente) nin asturianista.
¿Qué supondría pa la llingua y cultura asturiana la entrada d’UPyD nun hipotéticu Gobiernu?
El casu d’UPyD ye perreru. Ye un partíu contra les autonomíes, que tien como programa central reducir les autonomíes o suprimiles, y devolver competencies como sanidá y educación al estáu central. ¿A qué se presenten a un parlamentu autonómicu?
Esti mes cúmplense 14 años de l’aprobación de la Llei d’Usu del Asturianu, iniciativa del PAS que siguen ensin cumplise.
Convién recordar que costó munchu (y, en parte, costó-y a Marqués que lu echasen del PP, que lu echase Cascos). Convién recordar que diximos a tol mundu que diba ser lo único que díbamos tener en décades (o pa siempre). Y convién recordar que los ‘fenómenos’ (sedicentes asturianistes, l’Academia, IU…) ficieren una campaña terrible escontra nós por algamalo. Güei, como dixéramos, ye lo único qu’esiste (y, por desgracia, lo único que vamos tener). Los efectos fueren que l’únicu partíu que fexo daqué pol asturianu ta fuera’l Parlamentu. ¡Asturianaes!
¿Tienen los partíos políticos más consideración hacia la llingua asturiana anguaño qu’hai cinco llustros?
Apaecío. O sea, nada, la mayoría. Un migayín, dalgún. Menos mal qu’esiste la Llei y tienen que cumplila (toponimia, enseñanza…) y hai ehí un sitiu onde garrase. ¡Vamos ver lo que dura, con toles organizaciones parlamentaries despreciando l’asturianu o teniéndolu en casi nada!
Asturies camina hacia los 100.000 paraos y Arcelor-Mittal amenaza con desllocalizaciones. ¿El país tien futuru?
Más bien prietu. Y colo que se va votar nes prósimes elecciones, peor, sea cualo sea lo que se vote.
¿Cree que la ciudadanía ta realmente desencantada colos políticos?
Ta perdesencantada, pero son los ciudadanos los responsables de lo qu’hai y los que vuelven votar a los mesmos políticos a los que critiquen.
¿Qué valoración fai del movimientu 15-M?
Que too ello tien mui pocu contactu cola realidá, que ye parte del movimiento contra la política, y que tolos movimientos contra la política y los políticos inxamás tuvieren bonos resultaos pa la democracia y, polo tanto, pa toos y caún de los ciudadanos.
ASTURIES.COM del 18 de Marzu de 2012
No hay comentarios:
Publicar un comentario