Inaceptable, lo de Montoro y el PP

Está claro que l'amenaza d'intervención d'Asturies ye na más qu'una falcatrúa del PP pa facilitar que'l PP nun pacte con Foro n'Asturies, meyor, nun se vea mui presionáu a pactar y pueda disculpase coles sos bases por facelo.

L'amenaza d'intervención ye una mentira y una utilización del Estáu y del gobiernu inacaptable. En primer llugar, y según paez, les cuentes del gobiernu asturianu van cumplir col déficit señaláu pa la comunidá autónoma. En segundu llugar, una alvertencia d'esi tipu nun se fai más que dempués d'intercambiar documentos y argumentos de mou y manera reservao. En tercer llugar, nun se comunica al alto la lleva y al través d'una nota prensa. En cuartu llugar, sobre la mentira inicial de los datos, la mentira los argumentos: Asturies nun tien por qué recortar en sanidá nin n'educación, tien que recortar y puntu.

Asina que ye claro que la nota del Ministeriu de Facienda, el montorín, nun tien otru valir que la de servir d'instrumentu de la (des)negociación ente'l PP y Foro. Conclusión: l'estáu puestu al serviciu los intereses del partíu; los asturianos asobayaos (y amenazada la financiación de la so delda) al serviciu de los intereses del partíu.

Una entruga. ¿Atreveríase'l PP a facer esto con otros que nun fuesen los pininos de los asturianos, que nun pintamos nada?

Refervimientu: Una vegada más: los asturianos somos lo que queremos ser y tenemos lo que queremos tener. ¡Allá nós!