¡Qué güevos de política!

Como se sabe, los diputaos del Parlamentu Européu tomaren la decisión de que les pites teníen que vivir más cómodes dientro les xaules, con menos estrés. Asina que decidieren que, aparte otres meyores, teníen que convivir dientro la xaula xustamente la metada de les que lo facíen hasta agora.

Les meyores incorporen rascauñes, perches pa que se taraminguen y espurran les pates, bañu pa llimpiase'l culu y el plumaxe.

Too ello ta perbién. Pero l'efectu final ye qu'un montón d'empreses dedicaes a la producción de güevos yá pesllaren (por nun poder disponer del créditu suficiente pa les nueves instalaciones o pa la ampliación del solar), que la producción baxó un 30% y el preciu, un 50%. ¡Como si los güevos nun fuesen ún de los productos de consumu más elementales y necesarios, especialmente pa les cocines poco pudientes! Y como si una parte importante de la meyora de la salú de les últimes xeneraciones nun se debiera, precisamente, a la bayura de güevos (a la so producción industrial) y al preciu baratu.

Ún nun cree qu'un parlamentu européu valga pa nada (por munches razones), como'l Senáu. Pero yá que nun val pa nada podíen dexase de tocar los güevos a la xente y llimitase a cobrar, y nun a llexislar sobre la tranquilidá de les pites, y non sobre la salún y el bolsu los ciudadanos. Como, per otru llau, deberíen facer nel Senáu: cobrar y callar: polo menos, que nun dean la lata, o que nun nos los toquen.