La ofensiva centraliega (II): Durán propón que solo Catalunya, Euskadi, Navarra y Galicia conserven l'autonomía

Como vengo diciendo nel caberu añu y mediu, ta en marcha una brutal ofensiva centraliega de mena recentralizadora. Esa ofensiva (económica, mediática y política) nun vien solo de los xacobinos de tola vida, sinón de los d'Isabel y Fernando (como Esperanza Aguirre), pero tamién de los que creen que son "los de verdá". Asina, el cabezaleru d'Unió Democràtica de Catalunya (UDC), Josep Antoni Duran i Lleida, propunxo nuna carta a la militancia que solo hebia cuatro autonomíes, Catalunya, País Vasco, Navarra y Galicia.

La pretensión d'acabar col "café pa toos" (espresión que Durán cita lliteralmente nesa misiva) dende les llamaes "nacionalidaes hestóriques" (los "buenos", pa entendenos) nun ye nueva, sinón que vien dende'l momentu mesmu la transición. Y, como ye natural, nestos momentos, ellos tamién aprieten, al empar de xacobinos y isabel-fernandinos.

De manera nada sorprendente, acompáñenlos miles de bobos que quieren tamién la supresión de les autonomíes, pensando nun solo que van pesllar la suya (l'asturiana, por exemplu), sinón tamién "les de los malos" (catalanes, etc.). Pero eso nun va pasar nunca. Lo único que puede pasar, si vamos p'atrás (o "p'alantre", si-yos presta más), ye que queden eses cuatro autonomíes y los demás esapaezamos. Colo cual, yá se sabe, a buscar amigos en Madrid pa resolver les nuestres coses, y a que los señoritos de Madrid coloquen equí a los amigos pa mandar.

O sea que, como siempre, lo que piden tantos asturianos ye eso, ¡asturianaes!

¡Que'l Ñuberu nos piesque col capiellu puestu!


Más en: "Duran propone que solo Catalunya, Euskadi, Navarra y Galicia conserven la autonomía"