Acaben de ver la llume nuevos documentos del romance ente La Pardo Bazán y Galdós (La Pardo y Galdós). Vienen completar lo que yá sabíamos de la relación ente dambos.

Por cierto, don Benito yera home d'amoríos. Frutu d'un ellos, cola parraguesa Lorenza Cobián, naciera l'únicu fíu -nesti casu fía- reconocíu de Galdós, María Pérez Galdós Cobián. Daqué saben d'ello en Les Arriondes.

Y, a propósitu, ¿por qué La Pardo Bazán, espíritu llibre onde los hebia, muyer d'entamu personal innegable, cabezalera de tantes coses que dempués seríen normales ente les muyeres, nun figura ente les "figures" que sopelexen davezu les feministes? ¿Misteriu? ¡Qué va! Pola mesma razón, o sinrazones, que nun figuren Margaret Thatcher, Isabel la Católica, María de Francia, Teresa de Cepeda y Ahumada.  Ye verdá que, de xemes en cuando, sopelexen a Golda Meier, pero ye que nun la tienen mui bien clasificada.