Viésperes de la nuestra fiesta nacional, convién reflexonar sobre les nuestres señes d'identidá.
La mio muyer compró una pumaraína yá hai unos años, ensin dulda pa que nun m'aburriese y evitase les tentaciones mientres segaba, fradaba, sulfatiaba, atropaba...
Cuando nos fue visitar un buen amigu que tien oveyes y horru -vive n'Avilés y ye trabayador industrial- quedó un poco decepcionáu porque nun teníamos somieres como portiella de cierre, que, según él, yera un cierre habitual y guapu. Negámonos, claro, pero dempués yá comprobamos que, en toa Asturies, yeren munches les propiedaes que teníen el somier nun solo como portiella entrada, sinón a mou y manera de sebe, como cierre continuu, masque fuese parcialmente.
Esti día, el 27 d'agostu, púnxeme a pasear y correr pel parque Los Pericones. Ente'l campu fútbol de Los Pericones, el cementeriu El Sucu y la AS-248 hai una serie de praos abardaliaos, restos d'una de les munches caseríes qu'hebo na zona.
Pues bien, andando perillí, ente bardiales, escayos y lloreos que nel pasáu servíen pa llimitar la casería, atopé esti somier, casi escondíu, faciendo de puerta.
Yo pensaba que la "moda" los somieres yera cosa reciente, de los años sesenta p'acá, cuando'l campu empieza a degradase y entama tratase en parte por xente que combina campu y industria.
Pero esti somier vien confirmanos que'l somier como cierre de finques o como portiella ye yá una tradición asturiana de desayaque, munchu más antigua, ensin dulda, que la mayoría, por exemplu, de les llamaes "fiestes tradicionales".
¿Tenemos qu'arreyar el somier a la llista de les nuestres señes d'identidá, como una nueva seña d'identidá? Total, eso de subir al árbol a coyer flores (?) y atestongar pa coyeles, tien pocos años como seña d'identidá oficial.
07/08/17
No hay comentarios:
Publicar un comentario