Fais dos meses que tenía ganes de poner esti ensiertu. Fui dexándolo por unes o otres razones. Güei decídome.
Nun fai falta ver al Sporting más de cinco minutos pa saber lo que-y pasa:
1. Unos tipos que nun saben pasar un balón al compañeru: tírenlu onde nun pue algamalu, lloñe d'él sobrepasándolu, ensin llegar a él, a la so manzorga, a la so derecha, y claro, asina'l contrariu corta rápido'el pase. La solución habitual: pega-y un patadón al balón y mandalu a nenyures, esto ye, al contrariu.
2. Unos tipos que, en xeneral, nun saben parar un balón: lléga-yos y, al tocalu, escápase-yos unos metros p'alantre, colo que'l contrariu...
3. Unos tipos que nun tán desmarcaos inxamás ("nun s'ofrecen", que se diz agora, que paez una espresión d'un anunciu eróticu). Cuando ún quier da-yos el pase tán siempre cubiertos pol contrariu.
4. Unos tipos que, en defensa, "pierden la marca", que nun ye que sean "de marca" y que se-yos borre la etiqueta.
5. Unos tipos que nun tiren a puerta inxamás, como si tuviesen espritaos y confundiesen les crucetes de la portería con cruces o camentasen que los palos taben asperxaos con agua bendito.
6. Unos tipos que nun trabayen. "Hay que estar más atentos", dicen unos pa desplicar por qué tán ensin cubrir los delanteros del equipu contrariu nel área propia. "No podemos salir relajados, como lo hicimos en el primer tiempo", dicen otros. (Por cierto, que ye ya mal vieyu n'El Molinón: "Salimos con la caraja" solía decir Gerardo Ruiz nos frecuentes casos nos que los xugadores, cuando él yera'l preparador físicu, andaben a uves pel campu, pensando nes musarañes).
7. Un entrenador que, hasta agora, diz que "nun da cola tecla" o que la culpa ye d'él o que está "jodido", pero que promete un final feliz (la cosa paez tamién d'un anunciu eróticu) al terminar la temporada.
¿Conocen ustedes daqué empresa que siguiese pagando a final de mes a esta xente, especialmente cuando reconocen que salen al campu pensando n'otra cosa o pasando de too? ¿A que non?
No hay comentarios:
Publicar un comentario