El 05/09/16 asoleyaba yo un artículu en La Nueva España que se titulaba "El Ayuntamiento menosprecia a los difuntos" pola escasa atención que l'Ayuntamientu de Xixón prestaba nel a los vivos (darréu les dificultaes de desplazamientu y los obstáculos), pola desatención xeneralizada del interior, pola cerca esterior y les sos entraes, que ta fecha de piedra caliar vista y tosca, como la muria d'un prau nuna braña.
Pues bien, posteriormente, y dende fai meses, l'Ayuntamientu destinó unes brigaes a aperiar un migayín l'interior del cementeriu y a iguar un daqué la entrada nes puertes llaterales, como se ve na semeya qu'apurro equí.
(Aclaro que nun soi yo solu'l que protesté asoleyando la cochambre y pioyosería de tol cementeriu d'El Sucu. Pocos díes dempués (el 10/09/2016) facíalo, nun llargu artículu tituláu "El Suco: el trampantojo o la imbecilidad humana", Blas Fernández Gallego).
Pues bien, del mesmu mou, protesté'l 21/07/2017 contra'l desastre de munchos polígonos industriales en Xixón, que nun teníen dotación de fibra óptica o que teníen accesos polos que-yos yera imposible o perdifícil pasar a los camiones. "No es el único problema que tiene ese polígono -El de Lloreda, decía-:
carecen de servicio de fibra óptica y sus accesos están tan mal diseñados que
los camiones de cierta longitud han de tomar la rotonda de acceso por la
izquierda, ya que por la derecha no pueden realizar el giro. A veces, además,
coinciden con la salida de molinos eléctricos de una factoría próxima, lo que
hace más encantadora la situación".
Pues bien, fai poco acaben d'arreglar una d'aquelles rotondes que yo señalaba nel mio artículu, la d'enriba Tremañes que da accesu a polígonos industriales camín de Cenero.
¿Casualidá? Déxenme presumir de tener un migayín de parte neses igües, de pensar que, de xemes en cuandu, los mios artículos sirven d'obleru pa iguar les coses que se faen mal, masque solo sea un migayín.
No hay comentarios:
Publicar un comentario