Esta mañana, la del 20/01/2020, notificábame l'Academia de la Llingua Asturiana que m'otorgaben el Premiu Nacional de Lliteratura Asturiana na segunda edición.
Nun puedo dicir otra cosa que señalar lo que me presta. Al tiempu, quiero dar les gracies al xuráu que me dio'l premiu por unanimidá y a la propia Academia, la entamadora y caltenedora del mesmu.
Y, n'últimu términu y sobre too, quiero dar les gracies a los mios llectores y a los llectores de la lliteratura asturiana que son, a fin de cuentes, los que son la xustificación última del premiu.
Quédame, por cierto, señalar qu'al premiu concurrieren otros dos candidatos, que, ensin dulda, merecíen el premiu tanto como yo. Ellos, como otros munchos, representen l'altor que de cuarenta años p'acá algamó la lliteratura asturiana, a la que nun-y falta más que, como a la llingua, la so reconocencia estatal y un puntu mayor de presencia na sociedá asturiana.
Esta ye la comunicación:
Xuan Xosé Sánchez Vicente algama’l Premiu
Nacional de Lliteratura Asturiana na so segunda edición
L’escritor
asturianu Xuan Xosé Sánchez Vicente ye’l ganador de la segunda edición d’esti
premiu entamáu pola Academia de la Llingua Asturiana en 2016 pa facer pública
reconocencia del llabor normalizador que representa la creación lliteraria nel
idioma d’Asturies y el papel fundamental que xueguen los y les escritores en
llingua asturiana nel caltenimientu de la cultura de nueso.
Acordies coles bases del premiu, nun se valora una
obra lliteraria concreta sinón «el conxuntu de toa una
trayeutoria lliteraria, fecha a lo llargo del tiempu en llingua asturiana y la
so contribución a la dignificación social del asturianu».
El xuráu,
aconceyáu’l miércoles, día 15 de xineru, tuvo presidíu por D. Xosé Antón
González Riaño, Presidente de l’ALLA, y formáronlu los miembros de númberu de
la institución Dña. Ana María Cano González, D. Xosé Ramón Iglesias Cueva y
Dña. Carmen Muñiz Cachón; los profesores de la Universidá d’Uviéu D. José Luis
García Martín y D. Leopoldo Sánchez Torre; y fixo de Secretariu D. Antón García
Fernández, Direutor Xeneral de Planificación Llingüística y Normalización, en
representación del Gobiernu del Principáu d’Asturies.
Nesta edición les candidatures presentaes
fueron les de la escritora Dña. Lourdes Álvarez García y los
escritores D. Adolfo Camilo Díaz y D. Xuan Xosé Sánchez Vicente. El xuráu dexó afitao
nel acta onde se da cuenta del
alcuerdu algamáu que cualquiera
d’estes persones yera merecedora del premiu
magar que, por unanimidá,
decidiere conceder el II Premiu Nacional de
Lliteratura Asturiana 2020 al escritor D. Xuan
Xosé Sánchez Vicente, darréu de «la so trayeutoria
intelectual y lliteraria que lu convierten nun referente a lo llargo de
cinco décades y nún de los mayores
activos de la lliteratura asturiana». Tamién sorrayó que «amás de
cultivar con dedicación constante y aciertu tolos xéneros (poesía, narrativa,
teatru, ensayu), abrió caminos nuevos nesta milenaria llingua a partir d’un
fondu conocimientu y respetu pola tradición, de la que foi de los primeros
estudiosos y divulgadores».
El Premiu Nacional de Lliteratura Asturiana, que tien calter triañal y que ganare na so primer edición
l’escritor Xuan Bello, entregaráse-y a Sánchez Vicente’l 8 de mayu coincidiendo
cola celebración n’Uviéu del Día de les
Lletres Asturianes y lleva arreyada la espublización d’una pequeña amuesa
de la obra lliteraria del autor y la concesión d’un Medayón Conmemorativu,
diseñáu pol escultor Adolfo Manzano.
Uviéu, 20 de xineru de 2020
ACADEMIA DE LA LLINGUA ASTURIANA
No hay comentarios:
Publicar un comentario